115166688431696430

Stallsystur mínar eiga án efa eftir að afneita mér eftir lestur þessara hugleiðinga minna en ég tek því bara eins og öðru!

Við skötuhjúin fórum aldrei þessu vant að versla í gær! Það eitt og sér er í raun frásögu færandi þar sem Sveinbjörn er yfirleitt ekki sá viljugasti til að fara í þess kyns leiðangur, bæði af því að honum er illa við að eyða pening í vitleysu eins og föt og líka af því að honum finnst skelfilega leiðinlegt að fara að versla! Þar sem við erum flutt á nýjar slóðir fannst okkur tilvalið að smella okkur í Smáralind, áður átti Kringlan að mestu leyti hug okkar allan en það breytist líklega með styttri vegalengd í þá fyrrnefndu!

Ég var u.þ.b orðin þreytt eftir korter (s.s eftir að hafa borðað) og var aldrei með almennilegan hug í þetta. Nennti lítið að máta og sá eiginlega bara ekkert sem mig langaði í – alveg léleg! Náði þó að kaupa mér 1 bol og við fengum 2 fyrir 1 á skóm. Ég fékk 1 par og Sveinbjörn hitt – hann borgaði að sjálfsögðu enda herramaður með meiru! Hann stóð sig eiginlega betur en ég og það er að sjálfsögðu skömm að segja frá því!

Ég var alla vega kát þegar ég lagðist upp í mýksta sófa í geimi í gærkvöldi og gat horft heilalaus á einhvern þátt á Skjá 1 áður en despó byrjuðu!

Stundum á maður bara að liggja upp í sófa og gera nákvæmlega EKKI NEITT!

Ég hugsa að verslunarferð verði ekki á dagskrá hjá mér í bráð…

Já, ég veit að ég er blettur á kyni mínu og aumingi!

115158138293559262

Góðan daginn,

Kominn tími til að ég láti aðeins vita af mér!
Við sköthjúin erum búin að vera ansi bókuð seinustu daga. Mikið að gera í félagslífinu sem og vinnunni. Það er hins vegar alltaf góð tilfinning að hafa mikið af gera en ég neita því ekki að ég er soldið farin að þrá að gera ekki neitt og hafa það bara gott! Það er ekkert skip hjá mér fyrr en í næstu viku og því hélt ég að ég myndi ná að hvíla lúin bein soldið en sú hefur ekki verið raunin! Ég verð alveg ótrúlega þreytt í kringum 9 leytið á kvöldin en hressist í kringum 10 og get ómögulega sofnað fyrr en í kringum 12 og vakna því alltaf ofsalega þreytt á morgnana þar sem ég næ ekki 8 klukkutímunum mínum sem ég þarf nauðsynlega! Veit ekki hvað er að mér! Ég hugsa held ég alltof mikið!

Helgin var ansi pökkuð. Náðum þó að gera flesta hluti sem við ætluðum en laugardagskvöldið er undantekning frá þeirri reglu! Það var þó skemmtilegt kvöld þar sem sálfræðiskvísur fóru á kostum eins og svo oft áður! Á sunnudaginn svaf ég eins og ég fengi borgað fyrir það – frá rúmlega 4 til 13.15 (með smá hléum þó). Ég hef held ég aldrei sofið jafn mikið en þetta sagði mér bara það að ég væri enn þreytt eftir helgina á undan. Spilakvöldið tókst vel eins og alltaf þrátt fyrir að ég hefði endað í 2.sæti, við Kristín vorum stelpulið á móti strákunum sem spiluðu hver fyrir sig. Ég var aðeins að vinna heima og vissi því að ég næði ekki að einbeita mér 100% að þessu í byrjun og tók því þessa ákvörðun!

Það var síðan ansi mikið að gera í skipamálum í byrjun vikunnar og gleymdir lyklar og gleymd skjalataska bera þess glöggt vitni! Skjalataskan fer þó frá borði á Akureyri. En lyklarnir komust í mínar hendur á þriðjudagsmorgun!

Ég var síðan í saumaklúbbu í gær sem var einn skemmtilegasti saumaklúbbur frá upphafi. Ég hef ekki hlegið svona mikið í langan tíma. Árdís vinkona fór á kostum, nýkomin frá Kenýa og örlítið svefndrukkin! Kvöld sem gleymist seint!

Á morgun er síðan annað spilakvöld með genginu (Kristínu, Bjögga og Berg) og það verður án efa skemmtilegt! Restin af helginni er hins vegar ekki skipulögð en ég reikna með að gera eitthvað á laugardag og hafa það síðan bara gott á sunnudag! Spurning um að hreyfa rassgatið á sér soldið….hver veit! Maraþonþvottur bíður mín líka – reyni nú kannski að minnka hann eitthvað í kvöld!

Bið að heilsa ykkur í bili,

115135297416459992

Ég er augljós snillingur!

Hverjum öðrum en mér tækist að:
-gleyma lyklunum að fyritækjabílnum um borð í skemmtiferðarskipi og átta sig ekki á því fyrr en skipið væri komið frá landi?
-átta sig þá á því að lyklarnir að eigin bíl væru í veski sem væri læst inn í bílnum og lyklarnir að honum á leið frá landi?
-að fá far í vinnuna til að sækja lyklana að öðrum fyrirtækjabíl en koma að tómum kofanum hvað lykla varðar þar en nóg af bílum á bílastæðinu?

Já, ég er náttúrulega ansi einstök og hef átt í mjög skemmtilegu ástar/hatur sambandi við lykla og bíla í dag!

Pabbi reddaði auðvitað málunum og sótti frumburðinn í vinnuna og keyrði hana heim. Þá er bara vandamál að komast í vinnuna á morgun, þarf einhvern veginn að finna leið til að keyra bíl niður á höfn og keyra helst á tveimur tilbaka – einhver? Spurning um að láta klóna sig fyrir morgundaginn?

Annars er ég bara góð…lyklalaus en góð!

That´s all…

115106260920589952

Góðan daginn,

Það er alveg skandall að vera svona netlaus heima hjá sér. Ég hef nefnilega ansi takmarkaðan tíma til að skrifa hugleiðingar mínar í vinnunni og auk þess er það ansi truflandi þar sem hér er oft mikið fjör! Vinnuálagið mitt minnkar heldur ekkert sérstaklega mikið. Ég fæ reyndar eitthvað að sofa út um helgina sem er ágætis tilbreyting en í næstu viku byrjar fjörið! Þá eru ansi mörg skip og nokkur á sama tíma! Mér finnst það samt bara fínt þar sem ég hef alltaf notið þess að hafa nóg að gera! Þessa dagana er ég líka búin að starta 15000 heilsuátakinu mínu. Það er aðeins rólegra en oft áður þar sem markmiðið er einfaldlega það að hreyfa rassinn á mér 1x á dag. Ég er búin að vera í ansi langri hvílt að undanförnu og allt sem heitir frjálsar íþróttir hefur ekki átt heima á pallborðinu hjá mér! Áhugi minn á þeirri ágætu íþróttagrein er eitthvað fjarverandi í augnablikinu. Ég reikna þó með að hann birtist aftur með hækkandi sól og auknu þoli undirritaðrar.

Íbúðamál eru í góðu standi, við höfum reyndar ekki gert mikið undanfarið en ég vona að það sé af þeirri ástæðu einni að hún sé að mestu tilbúin. Við skötuhjúin erum reyndar búin að vera ansi þreytt seinustu daga og því hefur góða veðrið algjörlega farið framhjá okkur – eitthvað sem er ekki nógu gott!

Helgarplanið er löngu orðið klárt! Það er miðnæturhlaup í kvöld sem við verðum að starfa við. Á morgun er síðan frjáls tími fram yfir kvöldmat en eftir hann fer ég að græja mig í útskriftarpartý Agnesar, hún bauð mér fyrir ca.2 mánuðum síðan svo að þetta hefur staðið ansi lengi til! Þann sama dag ætla Silja vinkona og Vignir maðurinn hennar að halda upp á samtals 55 ára afmælið sitt. Ég reikna með að það verði ANSI mikið fjör þar ef ég þekki þau rétt! Við reynum að sjálfsögðu að kíkja þangað líka.

Á sunnudeginum hyggst ég svo hitta Lísu mína (nú eða á laugardaginn ef það hentar betur). Ég hugsa að ísbúðin verði einhvers staðar á vegi okkar – að sjálfsögðu verður bara jógurtís í boðinu (nema ef þetta verður á laugardaginn, þá er jú nammidagur). Seinni part sunnudags er svo á skipulaginu að halda all svakalegan spiladag þar sem allt gengið er á landinu – Kristín, Bjöggi og Bergur + við! Það gerist ekki mikið betra en það! Ég reikna fyrir fram með að við verðum að spila frá svona 4 og eitthvað fram eftir kvöldi!

Eins og þið sjáið verður mikið stuð og stemning og augljós eðalhelgi að renna upp! Ég er alla vega orðin ansi spennt!

Áhugasömum um íbúðarskoðun er bent á að hafa samband, það eru farnar skoðunarferðir á hverjum degi!¨

Gangið hægt um gleðinnar dyr!

115070476612727056

Morgen,

Góð helgi að baki þar sem ég svaf samtals í alltof fáa tíma. Ástæða þess er einföld, ég var með skip alla dagana. Vaknaði 7 á laugardagsmorgun, náði að leggja mig smá yfir daginn og það bjargaði kvöldinu. Óþekktaranginn, bróðir hans Sveinbjörns, var svo með partý á laugardagskvöldið og það hélt vöku fyrir mér til rúmlega 2 og tæpum 4 tímum seinna fór ég á fætur til að taka á móti skipi nr.2. Ég var svo auðvitað að vinna meirihluta dagsins en náði þó aðeins að leggja mig en það voru ekki 2 tímar. Síðan kvaddi ég bæði þessi skip í gærkvöldi og eyddi kvöldinu svo í góða sófanum okkar og horfði á King Kong – ágætis afþreying!
Í morgun reif ég mig svo enn á fætur kl.6 til að taka á móti þriðja skipinu! Mikið afskaplega fer það í taugarnar á mér þegar fólk talar saman á erlendu tungumáli sem ég skil ekki (rússnesku til að mynda) fyrir framan mig. Mér finnst það reyndar soldið dónalegt líka en ég veit að við erum líka dugleg í þessu en samt finnst mér þetta ekki fallega gert. Sérstaklega ekki þar sem ég var 1 en þau 3 – hefði verið í lagi ef ég hefði haft einhvern til að tala við en…

Í þessum skrifuðu orðum væri ég alveg til í að smella mér aðeins í rúmið mitt og kúra smá. Veitti ekkert af svona 3 tímum til viðbótar og þá væri ég góð og myndi losna við þennan hausverk sem er búinn að hrjá mig alla helgina.

En ég þarf víst að fara að gera eitthvað hérna…

Vildi bara aðeins láta heyra í mér!

Vonandi áttuð þið góða helgi,

115037446378578304

Allt gott!

Það er allt gott að frétta af mér. Ég er búin að vera að vinna talsvert og þess á milli reyni ég að fegra íbúðina eins og ég get. Það tekur sko tíma get ég sagt ykkur, ansi margir smáhlutir sem mynda einn endalausan saman!

Við skötuhjúin vorum reyndar veik í gær. Þó með sitthvorn kvillann. Sveinbjörn liggur núna í pestinni sem ég var með fyrir 2 vikum síðan, og er búinn að vera ansi slæmur! Í gær fékk ég einhver heiftarleg útbrot og leit einna helst út eins og blettatígur. Andlitið á mér og bringan voru rauðflekkótt og mig sveið svakalega í rauðu svæðin og klóraði mér mikið – alla vega þangað til viljastyrkurinn fór að kikka inn. Í dag er ég öllu skárri eftir að hafa sett á mig vænan skammt af sterakremi í gær en þó er ég ekki jafn fríð og ég vil helst vera! Finnst ekki á það bætandi að troða einhverjum flekkjum á mig til viðbótar við allt hitt! En þetta fer væntanlega með tímanum og verður vonandi orðið gott annað kvöld. Þá kemur matarklúbbsgengið í mat í nýju íbúðina – fyrst allra til að vera boðið í mat þangað. Eins gott að Sveinbjörn verði búinn að laga fornaldarstólana sem við erum með svo að fólk tolli í sætunum sínum!

Ég hafði hugsað mér að vera með innflutningspartý þennan dag en hætti við þar sem ég sá ekki fram á að allt yrði tilbúið og auk þess var Sveinbjörn verulega slappur og ég átti að taka á móti skipi á sunnudaginn. Í dag var ég ekki ýkja svekkt yfir þeirri ákvörðun þar sem skipið mitt kemur á laugardagsmorgun kl.07 í stað sunnudagsmorguns og verður yfir nótt. Á sunnudaginn kemur svo annað skip og verður frameftir degi svo að það verður í nægu að snúast hjá mér um helgina. Eitt til viðbótar kemur síðan á mánudaginn svo að það er fjör! Mér finnst þetta reyndar vera afskaplega skemmtilegt og því get ég ekki mikið kvartað. Ég er að vesenast allan daginn við að redda hinu og þessu og 17.júní verður bara að meiri áskorun fyrir mig! Hvað með það þó að svefn verði eitthvað af skornum skammti? Ég bæti mér það upp síðar! Næ kannski að leggja mig eitthvað á milli símtala…

Annars er helst í fréttum að tengdamamma smellti sér til Svíþjóðar og verður í 2 vikur svo að ég er núna stoltur húseigandi og forráðamaður 17 ára pjakks. Hlakka ansi mikið til þess að vera erfið móðir. Greyið er búinn að kvíða soldið fyrir þessu þar sem ég lofaði honum því að ég yrði ströng…múhahahaha. Nei, ég verð væntanlega sanngjörn en kem ekki til með að líða að hann verði á rúntinum fram á morgun. Set sem reglu að hann verði sofnaður áður en ég vakna en það var ekki staðreyndin seinustu helgi þegar ég vaknaði kl.5. Er að spá í að hafa útivistartímann til 02 um helgar. Hann þarf síðan að sjálfsögðu að borða matinn sem ég elda án þess að vera með eitthvað múður og jú auðvitað taka soldið til eins og hálf fullorðnum manni sæmir!

Uss, hvað þetta verður gaman…

Annars er held ég ekkert merkilegt að frétta í bili…læt vonandi í mér heyra með styttra millibili en netið er bara ekki komið í gagnið í nýju og því þarf ég alltaf að fara upp til að fara á netið og því nenni ég ekki mjög reglulega!

Læt þetta duga að sinni,

Blessuð!

115037379435904122

Ég skil ekkert í konum sem sturta niður með lokið uppi! Vilja þær virkilega setjast á setu sem er öll út í vatnsslettum? Ég eyði dýrmætum tíma í að þurrka vel og rækilega af setunni eftir svona subbur. Skammist ykkar bara!

114985402183904038

Stiklað á stóru

Á minni lífskæru bloggævi hef ég held ég aldrei verið jafn léleg að skrifa og um þessar mundir! Það er engin sérstök ástæða fyrir því. Ég hef ekki viljað skrifa neitt í vinnunni og internetið í nýja húsinu er ekki upp á marga fiska. Ég þarf að fara upp til tengdó til að ná þráðlausa netinu og því nenni ég ekki svo oft! Síðan hef ég haft í nægu að snúast undanfarið. Búið að vera slatti að gera í skipaviðskiptum og félagslífið hefur líka fengið sinn skerf undanfarið! Maður ætlar sér jú að gera svo margt á sumrin, það er tími skemmtilegheitanna, vinskapar og notalegheita.
Stiklur vikunnar eru hér á eftir:

*Ég var með skip á mánudaginn, var að vesenast í því frá 5 um nóttina og fram til 17. um daginn. Stuð hjá mér! Rakel og Himmi komu til að líta á nýju húsakynnin. Ótrúlega notalegt að sjá þau! Verður án efa endurtekið sem oftast í sumar!

*Ég hitti sálfræðiskvísurnar mínar á kaffihúsi á miðvikudag, það var að sjálfsögðu gaman að hitta þær eins og alltaf. Þær eru alltaf jafn sætar og það vekur óskipta athygli að sjá þrjár sætar ljóskur með einni stórri brúnhærðri.

*Ég smellti mér síðan í klippingu í gær og þrátt fyrir að Bergur hafi óspart hvatt mig til þess að fá mér ljósa lokka hélt ég bara þessum dökku, kann ágætlega við mig svona og klipparinn var því greinilega sammála þar sem hann fékk að ráða!

*Í dag er ég svo að fara í vissuferð með vinnunni. Það er reyndar ekki mikil vissa á bak við ferðina þar sem við erum bara búin að fá nokkrar vísbendingar. Ég er soldið spennt og hlakka til að fá að kynnast samstarfsfólki mínu almennilega!

*HM byrjar svo í dag, ég er líka ansi spennt fyrir því og hyggst horfa á ansi marga leiki. Ætla þó eitthvað að velja úr svo að ég verði ekki upptekinn frá 1 á daginn og fram til 10 á kvöldin – það gengur ekki! Annars er ég líka soldið spennt fyrir Beverly Hills og Melrose Place sem eru á Skjá1 – já, ég er sökker fyrir svona hallærisþáttum sem eru illa leiknir! Er að fatta að ég gleymdi að horfa á Prison Break á þriðjudaginn, SHIT! Á einhver þáttinn? Má ómögulega missa af þessu en þar sem það er komið sumar á ég til að vera soldið rugluð í dagsetningum! Brjálað svekkelsi í gangi!

*Á morgun er síðan gengishittingur, þá hittist gengið úr frjálsum. Það eru aldrei leiðinleg kvöld og því er ég orðin ansi spennt að hitta alla grísina mína á morgun! S.s nóg að gerast og nóg í bígerð!

En hádegismaturinn bíður, verðum í bandi

114937724942838020

ó, helló!

Héðan úr Breiðholtinu er allt gott að frétta. Flensan er soldið að renna af mér, ég hefði ekki trúað því á miðvikudag og fimmtudag en þá fannst mér ég u.þ.b vera að drepast! Ég vann líka í 16 tíma á miðvikudaginn og ég hef trú á því að það hafi haft ÖRLÍTIL áhrif. Vinnan mín er þó það skemmtileg að ég get ómögulega kvartað yfir því, þessir tímar liðu því eins og hendi væri veifað! Ég er alltaf að græja eitthvað í vinnunni, vesenast út af hinu og þessu og reyna að bjarga þessu og hinu fyrir skipin sem við erum að sjá um, hvort sem það er frystiskip eða skemmtiferðarskip. Ég hef að sjálfsögðu mjög gaman af öllu svona veseni og lifi mig algjörlega inn í það. Mér finnst líka gaman að kynnast nýju fólki og það skemmir auðvitað ekkert fyrir að það sé um borð í skemmtiferðarskipi. Ég fór um borð í mitt fyrsta á miðvikudaginn, gamalt skip en með mikla sál og mér fannst ansi mikið til þess koma. Þetta er hins vegar bara lamb miðað við nokkur sem ég á eftir að taka á móti í sumar og því er ég orðin ansi spennt. Já, það er ekki mikið svekkelsi að vakna snemma á morgnana til þess eins að skoða flott skip og hitta mikið af hressu fólki!

Íbúðin er öll að koma til. Eftir að flensan fór soldið að renna af mér í dag gat ég tekið soldið til og græjað. Eldhúsið er að taka á sig mynd þrátt fyrir að nokkur vandamál séu enn til staðar. Sveinbjörn er reyndar ekki sá auðveldasti í umgengni þessa dagana þar sem hann er ekki alveg eins og hugur minn – ég vil að hlutir séu gerðir hratt og örugglega og helst akkúrat á þeim tímapunkti sem mér detta þeir í hug! Ég þyrfti örugglega 10 stk. eins og hann til að framfylgja öllum mínum hugdettum en ég er ansi heppin með að vera ofvirk að hluta til og næ því oft að græja hugdetturnar mínar sjálf! Ég er til dæmis orðin ansi góð í því að skrúfa ómögulegar skrúfur í sem hann gefst upp á og með nokkuð góðum árangri! Ég er samt ekki svo lagin með rafmagnsskrúfjárnið svo að ég nota bara kastarahendurnar mínar í það og það hefur gengið ljómandi vel hingað til…Ég reikna með að vera búin að mestu á morgun!

Ég er síðan að vinna á mánudaginn, á von á skipi mjög snemma á mánudagsmorgun og reikna með að vera eitthvað að græja það allan daginn! Set Sveinbirni bara fyrir verkefni á meðan Eitthvað sem honum finnst BRJÁLAÐ skemmtilegt, eins og að hengja upp ljós og svona…hehehe!

Fullt af skemmtilegu fólki er að koma til landins núna – Kristín Birna var að koma heim frá San Diego í dag, ég ætla mér að kyssa hana og kjassa soldið á morgun. Sá hana seinast um jólin og það er orðið ANSI langt síðan. Hlakka verulega til að halda spilakvöld í sumar með henni og Bjögga. Hinir helmingar okkar Sveinbjörns eru svo væntanleg á morgun, Rakel og Himmi koma þá heim frá Köben. Við erum líka ansi spennt fyrir komu þeirra og hyggjumst hitta þau í seinasta lagi á mánudag! Þau verða líka kysst í bak og fyrir! Eitt af börnunum okkar og foreldrar þess komu svo fyrir helgi, Berglind, Helgi Skúli og Birta Júlía! Þau verður líka ansi gaman að hitta þar sem það er orðið ANSI langt síðan við sáum þeirra fríðu fés…Sem sagt margt skemmtilegt á dagskrá á næstu dögum…

En ég ætla að fara að raða inn í fataskáp og koma smá skipulagi á kaosina inn í svefnherbergi. Svo held ég að það sé spurning um að skúra og ryksuga svo að ég dreifi nú ekki sagi dagsins út um allt…hljómar það ekki vel?

Hversu mikið stuð er að vera að vinna á laugardagskvöldi kl.22? Ég er stuðbolti…