Mikið gaman, mikið grín

Ég er farin að trúa því að ég sé mjög pestasækin ung kona!

Tókst alla vega að ná mér í einhverja skíta magakveisu í kjölfarið á hinum slappleikanum mínum og var eiginlega alveg frá á fimmtudag og föstudag og náði því ekki að undirbúa mig eins vel fyrir prófið og ég ætlaði. En ég á alltaf góðar stundir á klósettinu og uppi í mjúka sófanum mínum svo að ég ætti ekki að kvarta mikið.

Annars gleymdi ég alltaf að tilkynna ykkur að við skötuhjúin keyptum okkur nýtt rúm um daginn. Fyrir áttum við smá sýnishorn af rúmi – 140×200 en ákváðum að taka þetta alla leið víst við værum að kaupa okkur rúm og nældum okkur í 200×200 cm rafmagnsrúm með tempurdýnu. Maður verður að gera þetta almennilega þegar maður slær til

Gamla rúmið hefur eignast nýjan eiganda á efri hæðinni. Hann er voða kátur með sýnishornið og líka sængina sem hann fékk í kaupbæti! Við skötuhjúin höfum þá sagt skilið við sameiginlegu sængina okkar og sofum núna með nokkra metra á milli með tvær sængur. Já, ég get ekki sagt að þetta hafi styrkt sambandið Nei, annars er voða stuð að velta sér nokkra hringi til þess að finna þennan líka sæta strák hinu megin í rúminu! Alltaf jafn skemmtilegt að  tékk hvort hann sé þar! Herbergið okkar er líka eitt rúm þessa dagana og ég spyr bara hvað maður þurfi fleira inn í svefnherbergið sitt? Þetta nægir okkur alla vega ágætlega…;)

Ég er annars að fara á bjórkvöld á Pravda með sálfræðiskvísunum, Sveinbjörn er er meðtalin í hópi skvísa og fær að fljóta með! Honum finnst nú ekki alslæmt að vera einn með fullt af ljóshærðum skvísum og mér. Ég nýt þess heiðurs að vera sætasta dökkhærða stelpan í hópnum – sú eina reyndar (Ásta, þú telst ekki með þar sem þú ert ekki að fara).

En já, þá þarf ég víst að fara úr Man.Utd peysunni, íþróttabuxunum og smella mér í sturtu og setja upp andlitið…best að hefjast handa…

Sjáumst,

Uppi á vitlausum tíma

Ég er alveg að sjá að ég hefði frekar átt að vera uppi á 17.öldinni en þeirri 21.  Ég hefði flokkast undir að vera algjör gyðja á þeim tíma í stað þess að vera í þybbnari kantinum á þessari öld.

Alveg veit ég ekki hvað guð var að hugsa þegar hann sendi mig hingað þar sem heimurinn gengur út á að allir líti út eins og fyrirsætur og allir eru stanslaust í megrun til að ná af sér óæskilegum kílóum!

Annars sá ég í blaðinu í dag að spænskar fyrirsætur væru verulega ósáttar við að nokkrar af þeim grennri í þeirra fagi hefðu verið útilokaðar frá sýningu um daginn. Þær segja að fagið krefjist þess af þeim að þær séu nægilega grannar og því sé ansi fúlt að fá bæði efri og neðri mörk! Mér finnst ekki fallegt að vera of horaður, ég hef sagt það ansi oft og segi það enn…ég vil hafa efri mörk í þessu og finnst frekar fallegra að vera aðeins of en van! Annars hef ég alltaf verið ansi geðveik í þessum efnum en hef núna hætt að hugsa um þetta og hef tekið þá ákvörðun að ég sé bara fín eins og ég er! Nenni ekki endalaust að vera að velta mér uppúr viðmiðum samfélagsins og hef því sett mín eigin! Ansi góð ákvörðun get ég sagt ykkur!

Ég er sem sagt að lesa kafla um átröskunarsjúkdóma og um leið offitusjúkdóminn alræmda. Hugsa að af tvennu illu myndi ég frekar vilja springa úr fitu en að deyja úr hungri. En hvað veit maður svo sem…

Annars er ég í maraþonlestri þar sem þessi vika verður ansi geðveik hjá mér. Ég er að fara í próf á laugardaginn, á að skila verkefni í tölfræði á mánudaginn og um leið að halda fyrirlestur í vinnusálfræði með stöllu minni! Það verður því lítið litið upp úr bókunum á næstunni en þegar þessu líkur þá tekur bara annað við…STUÐ!

En ég á 20 bls. eftir af kaflanum og ætla því að HELLA mér í þær….

BLESS…

Kirkjuklukkur

Ég vil byrja á því að þakka þeim fjölmörgu sem skrifuðu athugasemd við færsluna hér að neðan, ansi gaman að sjá svona marga tjá sig um eitthvað og í ansi löngu máli oft á tíðum. Ég hafði alla vega gaman af því að sjá mismunandi sýnir/skoðanir á heilbrigðisgeira okkar Íslendinga og greinilegt að margir hafa eitthvað til málanna að leggja!

Í framhaldi af því þá er tengdamamma ennþá inni á spítala og við höfum ekki heyrt neitt um heimkomu hennar! Við heimsóttum hana seinast á föstudaginn en ætlum að rúlla til hennar eftir að bókhlaðan lokar í dag og áður en við höldum heim á leið! Þá fáum við líklegast nýjar fréttir af framgöngu mála! Hún er samt orðin soldið betri og lyfjaskammturinn hennar var aðeins minnkaður. Hún var því soldið sprækari þegar við heyrðum í henni í gær heldur en þegar við sáum hana á föstudaginn og hvað þá á fimmtudaginn!

Annars gengur lífið bara sinn vanagang. Ég er að fara í próf á laugardaginn eftir viku og hef ekki mikið náð að læra fyrir það, er því að reyna að vinna upp gamlar syndir þessa helgi og var að læra í gærdag og er núna komin upp á Hlöðu og ætla að reyna að massa eins mikið og ég get – læri vonandi eins og vindurinn þegar ég hef lokið þessum skrifum…

En það er samt eitt sem ég hef ætlað að minnast á lengi – það eru kirkjuklukkur! Hvað er málið með að láta þær hringja stanslaust í 5-10 mínútur 5-7 sinnum á sunnudagsmorgnum? Halda hringjararnir virkilega að fólk átti sig á því að það sé messa í dag, drífi sig á fætur og borði til að komast glatt í hjarta í messu? Ég hugsa frekar að meginþorrinn verði pirraður yfir þessari truflun kl.10 á sunnudagsmorgnum og snúi sér pirrað yfir á hina hliðina og bíði eftir að þessum leiðinda hringingum ljúki og hugsi illa til þeirra! Ég verð alla vega ansi oft pirruð yfir þessum maraþonhringingum. Á Vopnafirði voru bara penar hringingar rétt fyrir messu sem mér fannst ansi hreint ágætar en þessi lög sem þeir reyna að spila hér eru fyrir neðan allar hellur! NIÐUR MEÐ BJÖLLUHRINGINGAR TAKK!

Já og þess ber að geta að ég er trúuð og hef oft gaman af því að fara í messur en þessar hringingar fá mig til að snúast algjörlega í þeim efnum – færi seint og um síðir að fara í messu hjá svona friðarspilli!

En jæja, þessir kaflar lesa sig víst ekki sjálfir…

Ég læt í mér heyra í bráð…

BLESSUÐ!

Hafdís hjúkrari

Hædíhó!

Eitt af því sem ég þoli ekki eru skítug handklæði! Ég á mjög erfitt með að þurrka mér í blaut handklæði og þá sérstaklega þau sem eru búin að blotna og þorna nokkrum sinnum og maður veit að ansi margir hafa þurrkað sér í þau á skömmum tíma! Ég skipti ansi reglulega um handklæði heima hjá mér og sérstaklega ef ég er búin að fá gesti þar sem handklæðin eru þá meira notuð! Mér finnst ég ekki vera hrein á höndunum eftir að hafa þurrkað mér í handklæði sem er hálfblautt. Mér finnst ég líka finna einhverja skrýtna lykt og því fær mín eina þráhyggja að blómstra þar sem mér finnst hendurnar á mér vera skítugar! Ég elska hins vegar hrein handklæði og að sama skapi hrein rúmföt. Ofsalega góð tilfinning

Annars var tengdamamma lögð inn á spítala um helgina. Hún er búin að vera að bíða eftir bakaðgerð í sumar og hefur smám saman verið að versna eftir því sem líður á sumarið og núna um helgina var hún svo svakalega þjáð að hún grét af sársauka. Í framhaldinu sendum við í samráði við mömmu hana upp á spítala. Mamma fór með henni og er enn miður sín yfir heilbrigðiskerfinu okkar. Það er ekki pláss fyrir sárkvalið fólk sem enginn getur séð um á spítalanum og því vildu þeir senda hana heim morguninn eftir. Við náðum að forða því og hún var ekki send heim fyrr en í gær, eftir að hafa hitt baklækninn sinn sem á að skera hana upp í október. Hann getur ekkert flýtt aðgerðinni þar sem það er uppbókað fram í október en hann var miður sín yfir ástandinu á henni en gat ekki gert neitt annað en að dópa hana upp og senda hana heim til okkar. Fyrir vikið höfum við ekki náð að fara í skólann þar sem hún getur alls ekki hugsað um sig sjálf. Hún kemst á klósettið með hjálp göngugrindar og sérstakri klósettsetu með handföngum en þar er það sem hún getur sjálf upptalið og ég þurfti meira að segja að hjálpa henni á klósettinu í gær þar sem hún sofnaði sitjandi á klósettinu. Enda er hún ekki með neinn eðlilegan lyfjaskammt! Og ég get alveg sagt ykkur að það er ástæða fyrir því að ég fór ekki í hjúkrunarfræði! Síðan þarf að passa upp á að hún taki lyfin sín og borði eitthvað annað en súkkulaðirúsínur og drekki coke light -  enda er það tvennt ekki sérstaklega gott fyrir sykursjúka konu! Við vorum heima í allan dag og pössuðum upp á hana og þjónustuðum hana eins og við getum en þolinmæðin okkar er alls ekki endalaus. Námið okkar hefur fengið að kenna á því í staðinn, við erum búin að vera að vesenast í kringum hana í ansi langan tíma, elda ofan í hana, kaupa lyf, fara í búð, skipta á rúminu, þvo þvott og setja í uppþvottavélina! Hún býr auðvitað bara ein með 17 ára syni sínum og hann getur auðvitað ekki gert neitt fyrir hana!

Svona er hún send heim af spítalanum. Hún er varla skiljanleg þar sem hún er á stórum verkjastillandi skammti + bólgueyðandi og einhverjum fleiri lyfjum. Ég hugsa að hún taki um 20 töflur á dag! Aðstaðan hérna er heldur ekki upp á marga fiska svo að göngugrindin kemst ekki almennilega fyrir þar sem hér eru þröskuldar og aðrar hindranir sem kona í hennar ásigkomulagi á erfitt með! Ég vil samt geta þess að sjúkrasagan hennar er lengri en ævisaga flestra myndi vera og hún hefur mátt þola ansi miklar kvalir í gegnum tíðina og því segir það ýmislegt þegar hún gefst upp og grætur af sársauka. Sá sársauki er MIKILL! Ég væri s.s dauð ef ég væri í hennar sporum!

Ríkisstjórnin vill síðan byggja hátæknisjúkrahús en getur ekki mannað þetta ,,venjulega” hér í bæ! Ég veit ekki hvað þeir eru að hugsa! Ástandið á þessu er alla vega alvarlegt og þarf að taka til endurskoðunar!

Okkar staða er þannig að aðgerðin hennar er eftir 2 vikur og þá fer hún inn á spítala í nokkra daga og síðan kemur hún aftur hingað til að jafna sig og þá þurfum við að hugsa um hana í næstu mánuði á eftir þangað til að hún getur séð um sig sjálf. Seinast þegar hún fór í svona aðgerð tók það hana um 5 mánuði að komast á lappir! Það bíða okkar sem sagt ansi skemmtilegar tímar á næstunni! Já, svo spyr fólk afhverju ég sé ekki hliðholl sjálfstæðisflokknum…Það er ansi slæmt þegar aðallega er hugsað um ríkisbubbana í landinu og þeir sem minna mega sín fá litla sem enga þjónustu!

Já, ég er pirruð!

UMMMMMMMHHHHHHHHHHH

Argentína var ÆÐI! Einu orðið sagt frábært! Maturinn var æðislegur, þjónustan frábær, stemningin ótrúlega rómantísk og allt fullkomið! Við skemmtum okkur þvílíkt vel og borðuðum á okkur gat! Vorum á Argentínu í rúmlega 3 og hálfan tíma. Sveinbjörn fékk sér fjögurra rétta sjávarrétta matseðil en ég ákvað bara að velja mér af matseðlinum. Hann fékk síðan glas með hverjum rétti – rosa góð vín. En ég valdi mér bara með mínum mat! Við fórum síðan á Ólíver og fengum okkur Mohito! Það var líka mjög skemmtilegt en við vorum snemma á ferðinni og þekktum engann og vorum síðan bara þreytt og ofsalega södd og ákváðum því bara að koma okkur heim!

En þetta var í einu orði sagt eitt besta kvöld lífs okkar! Við sjáum sko ekki eftir því að hafa sleppt borðstofustólunum!

Annars náði ég mér í leiðindapest í seinustu viku sem er enn að há mér, ég þarf að sofa í svona 10-12 tíma á nóttu til að fúnkera og er síðan soldið þreytt og sljó og búin að vera ansi slæm í maganum! Mamma, systir mín og amma voru líka með þetta og voru soldinn tíma að ná þessu úr sér! Ég þarf því bara að bíða þolinmóð og vona að ég verði ekki komin of langt á eftir öllum í skólanum áður en ég fer að fá einhvern styrk!

Annars var ég með skip í gær og líka í dag. Fór rétt eftir miðnætti á föstudaginn til Keflavíkur og Bergur var svo yndislegur að nenna að koma í roadtrip með mér. Annars hefði ég orðið VEL þreytt á leiðinni en þegar ég get malað allan tímann þá er þetta ekki næstum eins erfitt

Ég er síðan að fara til Keflavíkur aftur seinni partinn í dag og er aðeins búin að vera að vesenast með skipið.

Annars er bara gott að frétta…

Kjánaprik

Ég get stundum verið óttalegt kjánaprik og einstaklega sérstök ung kona! Mér dettur ansi oft í hug að gera ýmsa hluti á ansi kjánlegum tímum! Í morgun fannst mér einmitt ansi sniðugt að þrífa klósettið hátt og lágt í stað þess að klára að gera mig klára fyrir skólann! Það fer nefnilega ansi mikið í taugarnar á mér þegar það er búið að safnast fyrir ryk á vasknum – sérstaklega á vasknum í nýju íbúðinni þar sem hann er risastór eða smár, eftir því hvernig fólk lítur á það. Og því finnst mér hann oft ansi fljótur að verða skítugur! Ég var s.s að dunda mér við það að skrúbba hann og klósettið og annað smálegt inn á baði í morgun á meðan Sveinbjörn beið eftir því að ég yrði tilbúin – MJÖG SNIÐUG ung stúlka! Baðherbergið er reyndar ansi fínt eftir mig en fyrir vikið vorum við ENNÞÁ lengur að druslast í skólann! Ég er heppin að honum finnst ég sæt og því fyrirgefur hann mér ansi mikið þessi elska!

Annars eigum við 5 ára afmæli í vikunni og ætlum í tilefni þess að skella okkur út að borða á einhverja fínan stað – með hverju mælið þið?  Við erum ansi hrein hvað varðar svona fína veitingastaði. Fórum reyndar einu sinni á Skólabrú í boði mömmu – það var ansi fínt og við vorum ánægð með það. Síðan höfum við farið á Við Fjöruborðið á Stokkseyri einu sinni á afmælinu okkar og gistum svo á Hótel Örk í Hveragerði. Það var að hluta til líka í boði mömmu og að hluta í boði ömmu! Jább, ansi góðar konur í fjölskyldunni minni! Þannig að núna langar okkur að gera eitthvað skemmtilegt í tilefni dagsins og vantar ykkar hjálp! Hvaða staður er með góðan mat og smá vott af rómantík líka?

Annars er ég líka á því að ég eigi bara alls ekki neitt til að fara í og þurfi nauðsynlega að skella mér í búð fyrir helgi til að finna eitthvað sniðugt – einhver mótmæli? Nei, GOTT! Þá er það ákveðið!

En ég er víst að fara í tíma….

BLESSUÐ…………

Hvað er málið?

Ég hef verið að velta ansi mörgu fyrir mér um helgina! Það er eins og gengur og gerist, mismerkilegt en í mínum huga þó ansi merkilegt! Ég er auðvitað soldið spes!

1. Hvað er málið með litla penna? Hverjum datt í hug að minnka þá um helming? Ég skil ekki afhverju það á að vera eitthvað betra en sniðugra! Maður hefur einfaldlega verri stjórn á pennanum og gengur verr að skrifa með honum! Jú, jú – það sparar kannski smá pláss að hafa þá 10 cm stærri en allt annað er gegn þessari minnkun! Venjulega pakka á diskinn minn takk! Mér finnst alveg skelfilega leiðinlegt að þurfa að skrifa illa undir á nótum af þeirri sök einni að mér er réttur einhver dvergapenni! Ef ég væri bandarísk væri ég klárlega farin í mál við framleiðandann og sölustaðina sem nota slík sýnishorn af pennum fyrir að minnka sjálfsálit mitt – það gerist auðvitað með ljótri undirskrift!

2. Hvers vegna í andsk…eru mörk í kvennaboltanum ekki smækkuð aðeins? Hverjum finnst gaman að horfa á leiki sem enda 13-0? Þær þurfa ekkert annað en að hitta markið til að skora! Ég sé ekki alveg skemmtunina í því! Konur eru minni en karlar, kvennaáhöld í frjálsum eru minni og léttari og grindur lægri – hvers vegna mega fótboltamörk því ekki vera minni til að vera í sömu hlutföllum og hjá körlunum? Það væri alla vega ekki mjög töff að horfa á konur hlaupa yfir 106 cm háar grindur í grindahlaupi! Vona ég innilega að KSI sjái sóma sinn í því að fara með þessa beiðni mína til réttra aðila í hinum stóra heimi! TAKK!

3. Afhverju er fólk oft tillitslaust og ókurteist? Stafar það af slæmu uppeldi eða bara frekju og almennu hugsunaleysi fólks á gamals aldri? Ég var pirruð þegar kona á fertugsaldri (mjög nálægt 40 líklega). Talaði í símann á meðan verið var að afgreiða hana í bakaríinu í hádeginu og hámaði í sig brauð á meðan afgreiðslustúlkan var að reyna að ná sambandi við hana. Fyrir vikið tók ansi langan tíma að afgreiða konuna sem tók samtals 3 símtöl á meðan afgreiðslu stóð og lét afgreiðslustúlkuna bíða á meðan hún spurði börnin sín hvað þau langaði í í bakaríinu og þuldi allt upp sem var til…Þess ber auðvitað að geta að hún beið eftir afgreiðslu í svona 7 mínútur og á meðan var hún ekkert að gera…Spurning um að hringja þá í börnin sín og borða kannski frekar þá en á meðan verið var að afgreiða hana! Þetta tafði auðvitað þá 10 sem voru að bíða eftir afgreiðslu og fór verulega í mig og auðvitað afgreiðslustúlkuna sem að mínu mati hefði átt að neita að afgreiða hana! Þá hefði mér þótt hún töff!

En ég þarf að halda áfram að vinna – eigið góða helgi!

Ný og betri síða

Sigurjón var svo yndislegur að búa til alveg nýja síðu fyrir mig á nýjum og betri stað! Við vorum bæði orðin þreytt á þeirri gömlu en hann tók af skarið og útbjó alveg nýja fyrir mig! Hann er auðvitað BESTUR!

Blogspot hefur því sungið sitt síðasta fyrir mig í bili og ég vona að skrif mín komi til með að blómstra enn frekar á nýrri og endurbættri síðu!

Ég bið ykkur því að leggja slóðina á minnið og heimsækja mig á nýjan stað í áframhaldinu!

Góð helgi

Guten tag,

Ansi hreint góð helgi að renna sitt skeið! Ég var í fríi nánast ALLA helgina og það hefur ekki gerst í ansi langan tíma! Svakalega ljúft og gott að geta sofið út og hvílt sig. Það var orðið soldið langt síðan ég naut þess að gera nákvæmlega ekki neitt!

Við fórum reyndar í matarklúbb á föstudaginn. Það var auðvitað heilmikið stuð þar eins og vanalega! Mikið spjallað hlegið og vitleysast! Auðvitað litu nokkrar priceless myndir dagsins ljós eins og vaninn er þegar við sexmenningarnir hittumst! Við borðuðum að sjálfsögðu á okkur gat að því tilefni og fyrir vikið varð enginn neitt sérstaklega drukkinn. Ansi erfitt að finna á sér þegar maður er búinn að borða yfir sig! Rakel er bara OF góð að búa til pizzu og allar hjálparhendurnar gerðu þetta ekki verra…
Við fórum svo niður í bæ í smástund. Komumst þó fljótt að því að við vorum að hækka meðalaldurinn ansi mikið með því einu að vera á svæðinu! Einhver gaur hellti heilum bjór yfir Rakel þegar hún labbaði inn á fyrsta staðinn og því dó stemningin fljótt út! Við fórum því bara snemma heim eins og gamlingjum er von og vísa! Samt sem áður frábært kvöld í góðra vina hópi!

Í gærkvöldi fór Sveinbjörn á endurfundi hjá sínum árgangi í versló! Á meðan naut ég samvista varakærastanna minna tveggja, Bjögga og Bergs. Það var auðvitað svaka stuð hjá okkur þar sem kvöldið einkenndist þó aðallega af áti, áti og spilamennsku! Jóhanna leit svo á okkur í lok kvölds þegar Bjöggi var búinn að rúlla okkur Berg upp í Catan og ég var búin að sýna þeim hvernig maður spilar Scrabble! Bergur er náttúrulega dauðadæmdur í því spili en Bjöggi var ansi efnilegur! Okkur var samt eiginlega enn illt í maganum eftir allt átið um miðnætti og vorum öll líka ansi þreytt. Bjöggi var reyndar líka kominn með leiðindakvef og eiginlega bara orðinn veikur greyið! Hann var því sendur heim á meðan við hin höfðum það gott upp í sófa og spjölluðum fram á rauða nótt! Ég sótt Sveinbjörn svo á endurfundina og við fórum að sofa. Naut þess að sofa til 11 og er búin að hafa það gott upp í sófa í dag. Ansi notalegt að geta horft á Gullmót á skikkanlegum tíma og að geta bara legið upp í sófa og undirbúið sig fyrir átök vikunnar þegar skólinn byrjar og vinnan heldur áfram!

Veit ekki hversu auðvelt það verður að vakna kl.rúmlega 7 í fyrramálið til að mæta í skólann kl.8. Það verður líka soldið skrýtið að geta ekki lengur labbað í skólann og kíkt heim á milli tíma! Erfitt að vera nauðbeygður til þess að vera í skólanum frá 8.20 á morgun og til 17. En ég er nagli og hlýt að hafa það af!

Annars hefur ekkert djúsi gerst seinustu daga!
Rakel og Himmi eru að fara til Danmerkur í fyrramálið og koma ekki aftur fyrr en um jólin. Ég ætla að næla aðeins í rassgötin á þeim í dag til að kyssa þau smá áður en þau fara og lýsa yfir söknuði mínum! Sem betur fer eru þau á seinna ári af tveimur og því styttist í að þau flytji aftur til mín

Annars er bara allt við sama heygarðshornið?

Hvernig hafið þið það?