It´s a…

Eftirtaldir aðilar höfðu rétt fyrir sér í giskleiknum mikla:

Bergur,Bjöggi, Kristín, Ásta, Robbi, Guðný, Sigurjón, Silja, Eva Rós, Fjóla, Hildur og Fjóla Verkfræðiskvísa.

Verðlaunin í þessum mikla leik voru heiðurinn einn Til hamingju!

Nánari fréttir koma inn á morgun!

Próf, verkefni, verkefni, próf, próf

Já, lífið er ansi fjörugt þessa dagana. Ég var í prófi seinasta laugardag. Lærði u.þ.b af mér rassinn fyrir það. Hafði reyndar afskaplega lítinn tíma til að troða fróðleiknum inn í hugann og því var um maraþontroðslu að ræða á hverjum degi. Prófið gekk hins vegar ágætlega að ég held. Þann sama dag þurfti ég að klára seinasta skilaverkefnið mitt í tölfræði. Það gekk frekar hratt fyrir sig þar sem ég hafði unnið svipað verkefni áður. Fyrir vikið komst ég heim þægilega snemma til að geta horft á mynd nr. 2 af Pirates. Ágætis afþreying en ekki mikið meira en það.

Á sunnudaginn vorum við Sveinbjörn upp í skóla frá hádegi og fram til miðnættis. Ég þurfti að skrifa tvær greinargerðir um rannsóknargreinar í vinnusálfræði og skila þeim í gær. Ég var sem betur fer búinn með helminginn af þessu verkefni þar sem þetta tók þvílíkt langan tíma. Það þarf ansi oft að lesa svona greinar vel yfir til að komast að kjarna málsins þar sem enskan er kannski aðeins flóknari en ég á að venjast. Það þarf líka að hafa fyrir því að leita að nauðsynlegum upplýsingum og því þurfti ég voða mikið að fletta fram og tilbaka og lesa hvora grein fyrir sig ansi oft! En þetta hófst þó og ég skilaði kát í gær. Næsta laugardag er síðan síðasta hlutaprófið mitt. Það verður ansi ljúft þegar það er búið. Þá er formlegri kennslu lokið og upplestrarfrí hafið. Ég byrja í prófum 11.des og þarf því að halda vel á spöðunum eftir næstu helgi. Á eftir að lesa ANSI mikið fyrir fyrsta prófið og sömu sögu má segja um þriðja og síðasta prófið mitt en ég hef bara 1 dag frá prófi 2 og fram að prófi 3 svo að ég þarf eitthvað að skipuleggja og vesenast. Reikna með að skipulagsfræðingurinn minn hún Agnes komi sterk inn í það plan!

Eins og þið sjáið er lífið mitt ekkert sérstaklega spennandi um þessar mundir en það rætist vonandi eitthvað úr því í vikunni og ég vænti þess að koma með ansi skemmtilegar fréttir hérna inn á fimmtudagskvöld eða föstudagsmorgun – svo að þið ættuð að vera rétt stillt!

Bið að heilsa í bili,

Sigurvegari Gegndrepa

Bjöggi vinur minn, a.k.a Fast Bastard, gerði sér auðvitað lítið fyrir og tók Gegndrepa leikinn í nefið. Ég get ekki sagt að það hafi komið mér á óvart þar sem hann er þannig af guði gerður að hann vinnur yfirleitt ef hann ætlar sér það – nema kannski í CLUE þar sem ég rústa honum

Ég var ekki lítið montin af honum á meðan ferlinu stóð og horfði á alla þættina. Fannst hann auðvitað komast best frá þessu, einföld en skipulögð bleyting í hvert skipti sem svínvirkaði. Hann var ekkert í því að brjótast inn í hús eða skýla sér á bakvið varamanninn sinn! Ég var reyndar með smá smjörþef af ferlinu öllu saman þar sem við heyrum oft í þessari elsku. Hann kom líka einu sinni hlaupandi hingað og bað um lyklana að bílnum okkar. Þá fékk hann án þess að við spyrðum nokkurs. Stuttu seinna kom hann aftur, þá hafði skotmarkið hans séð bílinn hans en ekki hann svo að hann vantaði nýjan bíl til að geta elt hana. Við Sveinbjörn vorum því ansi oft spennt að vita hvað væri að gerast þar sem hann átti það til að gefa okkur smá upplýsingar um það sem væri að fara að gerast en ekki mikið meira en það! Við vorum því ansi spennt að sjá þættina þar sem við fengum ekki öll smáatriðin!

Mér fannst þátturinn í gær soldið skondinn, fannst fyndið að sjá hvað gaurinn sem var næst seinastur út var fúll – skil hann MJÖG vel þar sem ég hefði áreiðanlega verið það líka en Bjöggi gerði bara nákvæmlega það sama og hann hafði gert við ansi marga áður. Ég hló því og skríkti eins og smástelpa en sá jafnframt að ég hlyti að vera álíka asnaleg þegar ég tapa! Spurning um að hætta þessari tapsárni einhvern tímann!

En ég á að vera að læra próf á morgun! Er reyndar búin að lesa svo mikið í dag að mér er bæði illt í rassinum og bakinu! HRESSANDI!

Námsefnið er líka yfirmáta uppbyggilegt, þunglyndi, átraskanir, sjálfsvíg, persónuleikaraskanir og fleira yfirmáta spennandi. Ég er ekki frá því að ég fái vott af hverjum sjúkdóm við að lesa lýsinguna á honum en lækna auðvitað sjálfa mig um leið með því að lesa meðferðina…

Þakka einmitt guði á meðan lestri stendur fyrir að vera ekki með þunglyndi á háu stigi þar sem ég get ímyndað mér að lyfin við því séu hreinn vibbi…

ÞOTIN…………………..

Ef lífið væri bíómynd…

Ég fann ansi sniðugan leik á síðu hjá vinkonum mínum. Maður á að fara inn í lagasafnið sitt, setja á shuffle og skrifa lögin sem koma fram á listann hér að neðan.

Ég gerði þetta og margar niðurstöðurnar eru ansi skondnar og þó nokkrar eiga vel við! Áhrif Ellenar vinkonu gætir á listanum þar sem eitt Eurovision lag slæddist inn, ég setti nokkur lög inn fyrir hana til að koma henni á óvart og var aldrei búin að eyða þeim út þar sem ég hlusta auðvitað ALDREI á þau…Áhrifa Sigurjóns gætir auðvitað aðeins þarna líka þar sem ég hef mikið lagt mig fram í að rokka mig aðeins upp…Kom mér þó soldið á óvart að 3 ampop lög kæmu á listann þar sem ég á ekki mikið af ampop lögum í safninu mínu og skemmtileg tilviljun að þau komi akkúrat fram af þessum 2500 lögum sem ég á. Verð þó að geta þess að ég var með listann minn sorteraðann eftir nafni á lögum en ekki eftir listamönnum.

Ef lífið væri bíómynd – hvernig yrði lagalistinn þinn?

Svona virkar þetta:
1. Opnaðu lagasafnið þitt (iTunes, Winamp, Media Player, iPod, o.s.frv.)

2. Ýttu á uppstokkun (shuffle)

3. Ýttu á spila

4. Skrifðu nafnið á laginu og listamanninn hjá hverri spurningu

5. Þegar þú færð nýja spurningu ýttu þá á næsta lag

6. Ekki svindla og þykjast vera töff…

Ég tók mér það bessaleyfi að íslenska listann!

Opnunaratriði: Sometimes, somewhere, someone – La Luna

Þegar þú vaknar: On a day like today – Keane

Fyrsti skóladagurinn: Pour Que Tu M’aimes Encore – Celine Dion

Að verða ástfanginn: The strangest party – INXS

Slagsmálalag: Home Sweet Home – Ampop

Að hætta saman: Tied to the 90’s – Travis

Árshátíð: Floyd the barber (LIVE) – Nirvana

Lífið: Don’t let me down – Ampop

Andlegt áfall: Beatbox – Justin Timberlake

Að keyra: The same boy You’ve Always known – White stripes

Afturhvarf (Flashback): Chain reaction – Steps

Að taka aftur saman: Zadnych granic (Poland) – Ich Troje (Eurovision songcontest 2003)

Brúðkaup: Winter Solstice – Ampop

Fæðing barns: I Bruise Easily – Natasha Bedingfield

Lokabarátta: Cats in the craddle – Bon Jovi

Dauðaatriðið: Cry me a river – Justin Timberlake

Jarðarfararlag: Bailamos – Enrique Iglesias

Lokalag (þakkarlisti): The Joker – The Steve Miller

Það kom mér skemmtilega á óvart að I bruise Easily kæmi fram í fæðingu barns, finnst það passa skemmtilega vel við óhemjuna mig! Mér fannst líka ansi skondið að jarðarfararlagið mitt yrði ansi fjörugt lag með hjartaknúsaranum Enrique – ég vil auðvitað hafa soldið hressa stemningu í jarðarförinni minni…Ég hef reyndar ekki hugmynd um hvernig sum lögin hljóma. Gerði þennan lista í skólanum og gat því ekki haft kveikt á hátalaranum mínum svo að ég veit svo sem ekki hversu viðeigandi þessi listi er. Ansi skondið að ekkert lag sem ég hlusta MJÖG reglulega á hafi komist inn á listann.

Skora á ykkur að taka þátt í þessu og setja inn í athugasemdir hér fyrir neðan…

Meiri snjó, meiri snjó, meiri snjó…

Ég er ekki frá því að jólaskapið sé soldið farið að láta að sér kveða. Það er óvenju snemma á ferðinni hjá mér í ár, kemur vanalega ekki fyrr en um þetta leyti í desember. Ég veit ekki hvað veldur þessari óvæntu breytingu en ég fagna henni frekar en hitt. Snjórinn er heldur ekki að skemma fyrir þar sem ég er í fyrsta skipti síðan ég flutti til Reykjavíkur árið 1997 mjög ánægð með tilveru hans. Ég hef alltaf verið í þeirri aðstöðu að vilja ekki snjó því að hann tafði mjög fyrir útihlaupum og æfingum og því var notalegt þegar gangstéttir voru auðar og veður milt. Núna er ég ekki mikið að dunda mér við útihlaup og því finnst mér fínt að hafa smá hvíta slæðu yfir öllu.

Um helgina langaði mig gríðarlega mikið til að fara að skreyta hjá mér. Mér finnst útiseríur með svona þykku snjólagi svo ofsalega flottar og mig langar líka rosalega mikið til að fara að skreyta stofugluggana mína. Er eiginlega búin að ákveða hvernig mig langar að hafa þá og það eykur auðvitað á spennuna! Ég hugsa þó að ég fari ekki að skreyta fyrr en eftir 2 vikur þegar ég er búin í þessum 2 hlutaprófum sem ég á eftir fyrir lokapróf. Auk þess á ég eftir að skila 1 greinargerð og 1 skilaverkefni! Síðan taka prófin við og dagskráin hjá mér þetta árið er 11., 14. og 16. desember. Þetta er óvenju snemmt fyrir mig og því fagna ég auðvitað en hefði gjarnan viljað hafa aðeins jafnari dagadreifingu á þessu! Ég held að ég verði búin í skólanum 2. des og því ætti ég í raun að hafa nægan tima til að lesa upp gamlar syndir og fara yfir efnið sem ég er nú þegar búin að lesa. Eitt fagið sem ég er í virkar þannig að það er hægt að láta 3 hlutapróf gilda 100% og sleppa lokaprófi í stað þess að taka 60% lokapróf á móti 40% í tveimur sterkari hlutaprófunum. Mér tókst að klúðra einu af þessum prófum (búin í 2) og því verður einkunnin mín ekki alveg eins og ég vonaði en þar sem lokaprófið er 16. des eins og seinasta prófið mitt get ég ómögulega farið í það. Kem ekki til með að þola að taka 1 próf fyrir hádegi og annað eftir hádegi. Sérstaklega ekki þar sem prófið mitt þann 14. er sett á eftir hádegi og því enn minni tími til að læra fyrir lokaprófið!

Ég fór aðeins út í gær að leika mér í snjónum. Það var örugglega 30 cm lag af snjó ofan á jeppanum hans tengdapabba sem við erum að passa. Mig langaði að skella mér í pönnukökur til mömmu og fannst því lítið mál að hreina af bílnum. Ég henti auðvitað nokkrum snjóboltum og skoppaði glöð út um allt og hreinsaði bílinn og að lokum var svona 90% af því sem var á bílnum komið á mig! Ég er jú auðvitað pen eins og pabbi! Það er voða ljúft að vera á jeppa þegar færðin er svona og ekki skemmir hitinn í sætunum fyrir! Þetta verður þó skammvinn hamingja þar sem tengdapabbi er væntanlegur aftur eftir 10 daga og þá verður druslan aftur tekin í notkun!

Svona veður dregur fram barnið í mér  og því hafði ég mikla löngun til að búa til snjókall, gera snjóengil og fara að renna mér í gær! Væri alveg til í að eiga eins og eitt stykki Stiga-sleða þegar aðstæður eru svona!

Heil og sæl,

Í� fréttum er þetta helst:

Er einhver annar en ég búinn að fá upp í kok af gömlum fréttum? Fréttum um hvað ekkert hefur gengið í Olíufélaga-dóminum og nákvæmar fréttir um framgang þeirra mála í öllum fréttum í þessari viku. Svo finnst mér alveg ótrúlega leiðinlegt að horfa á sömu fréttirnar aftur og aftur, kvöld eftir kvöld. Ég er alveg búin að ná því að það eru lélegar merkingar á Reykjanesbrautinni og að hún er hættuleg í myrkri. Ég vissi það reyndar áður en þetta slys átti sér stað þar sem ég hef keyrt þarna í gegn 2-3 sinnum síðan framkvæmdir hófust og var því meðvituð um að það þyrfti að keyra hægar og fara varlega. Það hjálpar mér lítið að sjá frétt eftir frétt um þetta þar sem eini munurinn er viðmælandinn!

Mér finnast fréttir um dóm um biskupamálið líka alveg ótrúlega leiðinlegar og það kemur mér ekkert á óvart að það sé spilling þar eins og annars staðar! Ég nenni því takmarkað að horfa á fréttir um þessar mundir þar sem nákvæmlega ekkert merkilegt er í þeim og kýs þá frekar að lesa þær sjálf í blaðinu þar sem ég get valið og hafnað! Svona gúrkutíðir eru eiginlega alveg óþolandi!

Það er heldur ekkert smá sem fréttir fjalla um myndina Borat um þessar mundir. Það er alltaf að koma fram frétt um nýtt fólk sem ætlar að fara í mál við þá sem stóðu að þessari mynd og greinilegt að hún er búin að hneyksla marga. Ég efast um að ég fari að sjá hana í bíó. Hugsa að þetta sé ekki mynd fyrir mig. Húmorinn minn er einfaldlega það lélegur að ég hef einfaldlega ekki húmor fyrir svona vitleysishætti. Hugsa að þetta sé ekki nógu aulalegt fyrir mig!

Annars fer þetta frost að drepa mig. Það er búið að vera svo kalt inni í íbúðinni okkar sem er frekar gölluð þegar kemur að lagnakerfi svo að ég sit yfirleitt frekar vel klædd undir teppi, í flíssokkum og nokkrum peysum!

Fleira var það ekki að sinni, verið þið sæl!

Hvað er málið?

Ég hef alla mína hunds og kattartíð haft mikinn áhuga á íslenskri tungu og hef eftir fremsta megni reynt að tileinka mér hana. Ég er auk þess mikil áhugakona um rétt málfar og stend mig því oft og iðulega að því að leiðrétta annað fólk. Stundum hef ég gleymt mér og leiðrétt fólk sem er mér talsvert æðra og ég hefði betur látið ógert en stundum get ég bara ekki gert neitt að því og leiðréttingarnar detta sjálfkrafa út úr mér. Vinir mínir eru, að ég held, löngu hættir að kippa sér upp við þetta og eru frekar farnir að velja úr hvaða gagnrýni þeir taka við og hverri þeir kjósa að gleyma.

Ég hef líka mikið velt fyrir mér hvaða áhrif alls kyns tækninýjungar hafa á tungumálið okkar. Hvort að styttingar, slettur og skammstafanir breyti einhverju um orðaforða barna eða hvort að þau séu jafn fjölhæf og málfræðingar vilja halda fram, að þau geti hreinlega tileinkað sér nokkur afbrigði af málinu og notað þessi afbrigði á mismunandi vígstöðvum. Talað eitt ,,mál” við vini sína og kunningja, annað í skólanum og notað enn eitt í gegnum smáskilaboð og MSN – sem ég hef reynt að íslenska í boðbera án mikils árangurs. Ég gerði ásamt vinkonu minni smá rannsókn á þessu fyrir nokkru síðan þar sem við skoðuðum og kóðuðum boðberasamtöl (msn) nokkurra krakka úr 6.bekk. Þar kom í ljós að þau nota slettur og styttingar talsvert mikið þegar þau eru að tala saman á msn og afbaka tungumálið jafnvel. Í framhaldinu hefur mig alltaf langað til að gera könnun þar sem ég skoða hvort að þau geti skrifað rétta íslensku í tímum í skólanum og hvort að þessi tækninotkun hafi engin áhrif á orðaforðann þeirra. Hvort að orðaforði barna nú til dags sé að einhverju leyti minni en forvera þeirra fyrir 10 árum síðan.

Ég á litlar frænkur sem eiga heimasíður eins og þessa. Þær eiga það til að skrifa frekar vitlaust inn á sínar síður sem ég viðurkenni að fer örlítið í taugarnar á mér. Ég hef þá skoðun að fólk sem að talar vitlaust sé að einhverju leyti ekki jafn gáfað og það sem að talar rétt og um daginn fékk ég að heyra frá virtum kennara í sálfræði að er hans líka. Ég reyni þó að halda þessari skoðun minni í lágmarki en sjálfkrafa finnst mér þetta samt. Ég skil auðvitað að börn skrifi ekki eins góða íslensku og þeir sem eldri eru, af þeirri ástæðu einni að þau eru ekki jafn þjál í að nota hana. Þessar frænkur mínar eiga það til að skrifa orð nákvæmlega eins og þau eru sögð. Þær SEIGJA til dæmis frá einhverju, baraa er algengt, alt í læ kemur oft fyrir og annað í þeim dúr. Ég á stundum erfitt með að lesa þetta þar sem ég er mun fljótari að lesa setningar sem eru rétt skrifaðar en þær sem eru með einhverjum vitleysum í. Sjálfkrafa leiðrétti ég til dæmis glósur, glærur og annað slíkt efni sem ég fæ upp í hendurnar þar sem mér finnst ómögulegt að lesa það með vitleysunum. Fyrir vikið er ég orðin ansi þjálfuð í yfirlestri.

Það sem kemur mér samt verulega á óvart í öllu þessu er notkun ungmenna nú til dags á orðin LOVE. Þau skrifa í gríð og erg Luv u – luf ú eða eitthvað álíka og allir virðast eiga nokkra sem þeir elska. Fyrir mér er þetta orð frekar heilagt og ekki ýkja margir sem heyra þetta koma frá mér – bara þeir sem standa mér allra, allra næst og sá eini sem fær að heyra þetta reglulega er Sveinbjörn. Ástúð er samt eitthvað sem ég á auðvelt með að sýna og ég held að flestir vinir mínir geti staðfest það að ég læt reglulega í ljós tilfinningar mínar og minni þau reglulega á að mér þyki vænt um þau, nú eða að ég sakni þeirra eða kjósi að vera í þeirra félagsskap. En orðið ELSKA er eitthvað sem ég segi ekki hverjum sem er af þeirri ástæðu einni að ég elska ekki hvern sem er. Enska orðið hefur þó alltaf verið notað meira hversdags en þetta íslenska og þetta virðist ungdómurinn nýta sér. Ég held að ég eigi nú samt langt í land í að skrifa luv u í gríð og erg á síður vina minna og vandamanna. Ég get hins vegar auðveldlega minnt fólk á að mér þyki vænt um það en ég geng ekki mikið lengra en það. Sakna þín er þó þar á eftir!

En þetta er farið að minna á lönguvitleysu hjá mér og því hugsa ég að það sé sniðugt fyrir mig að hætta þessari vitleysu og fara að lesa soldið!

Yfir og út!

Fyrir þá sem þora…

Lísan mín skoraði á mig að setja á þetta á síðuna mína. Þeir sem vilja og/eða hafa tíma til mega gjarnan fylla þetta út!

Annars skora á Sigurjón sæfara, Kristínu Birnu, Agnesi og Evu Rós að henda þessu inn á sína síðu…

1. miðnafnið þitt:
2. Aldur:
3. Single or Taken:
4. Uppáhalds bíómynd:
5. Uppáhalds lag:
6. Uppáhaldshljómsveit:
7. Dirty or Clean:
8. Tattoo eða göt:
9. Þekkjumst við persónulega?
10. Hver er tilgangurinn með lífinu?
11. Myndiru bakka mig upp í slagsmálum?
12. Myndiru þaga yfir leyndarmáli ef það skipti mig máli?
13. Besta minningin þín um okkur?
14. Myndir þú gefa mér nýra?
15. Segðu eitthvað skrýtið um þig:
16. Myndir þú hugsa um mig ef ég væri veik?
17. Getum við hist og bakað köku?
18. Hefuru heyrt kjaftasögu um mig nýlega?
19. Talaru eða hefuru talað illa um mig?
20. Finnst þér ég góð manneskja?
21. Myndir þú kerya með mér hringinn í kringum landið?
22. Finnst þér ég aðlaðandi?
23. Hverju myndiru vilja breyta í mínu fari?
24. Í hverju sefuru?
25. Kæmiru í heimsókn af tilefnislausu, bara til að chilla?
26. Myndir þú koma á stefnumót ef ég myndi bjóða þér?
27. Ef ég ætti einn dag ólifaðann, hvað myndum við gera?
28. Ætlaru að setja þetta á þína síðu svo ég geti fyllt þetta út?

Fyrirfram þökk og góðar stundir!

Reykingar

Ég er alltaf að komast betur og betur að því hvað mér er illa við reykingar. Fór á kaffihús með sálfræðiskvísunum í gær. Ég þurfti auðvitað að setja ALLT sem ég var í beint í óhreinatauið þar sem lyktin var hreinn viðbjóður – kannski réttara að segja óhreinn en þið skiljið mig! Ég átti síðan í mesta basli með að sofna þar sem ég fann lyktina af hárinu á mér og húðinni svo vel í staðinn fyrir góðu lyktina af rúmfötunum. Fyrir vikið svaf ég líka illa og var alltaf að vakna og því var sturtan sem ég tók í morgun ansi langþráð. Hér með lýsi ég því líka yfir að fætur mínir koma ekki til með að stíga inn fyrir dyr á kaffihúsi í bráð. Hugsa að ég fari ekki neitt á kaffihús næsta árið og jafnvel lengur en það! Nema auðvitað ef kaffihúsið er reyklaust – er það í september á næsta ári? Annars finnst mér hvort eð er okrað á þessum húsum og það hæfir auðvitað ekki fátækum námsmönnum!

Kaffihúsakvöld verða því frekar í boði heima hjá mér þar sem ég skal jafnvel rembast við að búa til kakó og baka köku!

Annars þarf ég að fara að leiðrétta fordóma mína gagnvart reykingafólki svo að ég geti haldið áfram samskiptum mínum við þessa örfáu sem mér þykir vænt um og þjást af þessari vitleysu sem eiturgufufíknin er! Er að vinna í meðferð á sjálfri mér!

Annars er ég búin að fá aðra einkunina af tveimur úr prófum seinustu helgar og það kom afskaplega vel út fyrir mig. Sérstaklega í ljósi þess að yfirlit úr köflunum og nokkrar myndir voru allt og sumt sem ég náði að lesa fyrir prófið þar sem hitt prófið gilti meira og var því ofar á forgangslistanum! Ég fékk 8 og var heilum hærri en meðaltalið! Lengi lifi heppnin! Ég bíð spennt eftir hinni niðurstöðunni og vona að hún verði eitthvað svipuð, þá verð ég glöð!

Annars dettur danskennslan mín niður í kvöld svo að allt í einu hef ég ekkert annað að gera en að hafa það gott og horfa á alla sjónvarpsþættina mína! En það verður bara notalegt!

Annars gengur bara allt vel og allir eru sprækir! Hér með set ég því punkt í þessa reykingaumræðu mína nr.20.004.829.184

Heil og sæl!

BÚIÐ

Nú er mesta törnin loksins afstaðin! Ég fór í prófin mín tvö í gær, annað frá 11-12 og hitt frá13.30-15.30. Mikið afskaplega var svo gott að vera búin, komast heim og njóta þess að gera ekki rassgat fram að mat. Ég lá upp í sófa, horfði á Friends og naut þess til hins ítrasta að þurfa ekki að lesa frá mér allt vit. Eftir þessa törn er ég komin með smá smjörþef á hvernig jólaprófin verða og sé fram á að ég komist alla vega í gegnum hana. Það verða þrjú próf á 5 dögum svo að leiðindin taka fljótt af! Ég er líka búin óvenju snemma í ár, 16.desember kl.12. Ansi lukkuleg með það þar sem ég hef undanfarin ár verið búin á seinasta prófdegi, 21.desember. Í ár sé ég því fram á að geta dúllað mér soldið við að versla gjafir, jafnvel bakað eins og eina tegund af smákökum og verið soldið myndarleg svona til tilbreytingar!

Annars er ég skíthrædd við þetta jólaskap sem er að hellast yfir mig. Ég er voðalega ánægð með skreytingarnar á fyrirtækjum, finnst gaman að sjá einstaka hús með seríu í glugganum og þetta náði allt hámarki í gær þegar ég fór í mat til mömmu þar sem hún bauð upp á svínakjöt og sykraðar kartöflur. Jólalyktin var allt um kring og ég varð því bara spenntari ef eitthvað er! Ég hlakka líka soldið til að hafa pláss fyrir jólatré og annað skemmtilegt í stóru íbúðinni og svo er auðvitað gaman að fá nýja glugga og staði til að skreyta.

Veðrið á Íslandi í dag er annars ekki upp á marga fiska – leiðindastormur og í gær var meiri rigning en ég hef nokkurn tímann séð! Ég var ansi sæl að vera á almennilegum bíl þá en tengdapabbi lánaða okkur nýja jepplinginn sinn fyrr í vikunni. Við erum að passa hann í tæplega mánuð á meðan tengdapabbi spókar sig um á ströndum Tenerife! Viðurkenni þó fúslega að ég væri alveg til í að vera þar um þessar mundir í staðinn fyrir að vera föst heima í brjáluðu veðri! En víst ég er farin að óska mér væri ég auðvitað mest til í að vera í Bandaríkjunum um þessar mundir að hitta allt liðið sem býr þar! Langar alveg skelfilega mikið að fara þangað um þessar mundir…

Annars er ég aðeins búin að fylgjast með vali stjórnmálaflokkana á listum sínum fyrir næstu alþingiskosningar. Verð að segja að ég er soldið hrædd við sjálfstæðisfólk í ár. Sýnist hörku fólk vera að koma nýtt inn hjá þeim og í fyrsta skipti á ævinni líst mér vel á eitthvern á þeim lista – Robbi ég er ekki að fara í einhverjar þrætur um þetta! Ég er ekki mikil sjálfstæðiskona í mér en sýnist á öllu að hinir flokkarnir séu ekki að ná eins góðu fólki inn en þetta á nú allt eftir að skýrast á næstunni og ég vona svo sannarlega að þetta eigi eftir að breytast eitthvað…

Í dag langar mig alveg ótrúlega að spila og gera eitthvað skemmtilegt en hugsa þó að ég reyni að halda mig í lærdómsgírnum og læri fyrir morgundaginn og klári krossapróf á netinu. Já, líf mitt er svo sannarlega spennandi um þessar mundir!