End of an era

Við Eva kláruðum merkan áfanga í okkar lífi rétt í þessu þegar seinasti punkturinn var settur í ritgerðina okkar og lokayfirlestur fór fram. Á morgun fara herlegheitin í prentsmiðju og svo skilum við ritgerðinni líklega af okkur á morgun eða hinn.

Það er soldið skrýtið að vera búinn að klára þennan áfanga þar sem við erum búnar að vera svo lengi að vinna í þessu. En GUÐ hvað það er gott að vera búin með þetta! YNDISLEG TILFINNING! Núna get ég farið að einbeita mér að því að hafa það gott með litla stráknum mínum, farið í göngutúra, lagt mig á daginn, gert fínt heima hjá mér, farið í heimsóknir og notið þess að gera ekki neitt! Lífið er yndislegt!

Núna er ég að njóta þess að horfa á sjónvarpið og hafa það gott svo að ég ætla að halda því áfram!

Heyri í ykkur seinna!

Kosningar

Eins og áður sagði er ég í stökustu vandræðum með hvað ég eigi að kjósa í alþingiskosningunum á laugardaginn. Ég hef haft afskaplega lítinn tíma til að kynna mér stefnur flokkanna og fyrir vikið er ég frekar týnd í þessu kraðaki öllu.

Ég tók könnun í gær sem er útbúin út frá stefnum flokkanna og gefur þér upp hlutfallslegan stuðning við hvern og einn og segir þér hvaða stefna falli best að þínum skoðunum. Þessa könnun má finna HÉR.  Mér finnst þetta soldið sniðugt og hjálpar eflaust einhverjum óákveðnum en persónulega er ég oft beggja blands varðandi þessar fullyrðingar. Ég er oft sammála þeim að hluta til en ekki að öllu leyti. Til dæmis er ég á því að hefta eigi innflutning verkafólks að einhverju leyti. Ég hef ekkert á móti verkafólki sem kemur hingað gagngert til að vinna að einhverju verkefni og fer síðan aftur en ég er soldið hrædd við alla þá sem koma hingað og setjast hér að. Þeir sem koma hingað gagngert til að vinna eru að borga skatta og annað slíkt en nýta sér ekki neina þjónustu. Þeir eldast ekki hérna, nota læknisþjónustu takmarkað og annað slíkt. Hinir eru hins vegar meiri baggi á kerfinu þar sem þeir þurfa jú sömu þjónustu og hreinræktaðir Íslendingar. Fyrir vikið átti ég erfitt með að svara spurningu um hvort að takmarka ætti innflutning verkafólks til landsins. Flestar spurningarnar voru þess eðlis að mér fannst erfitt að taka afstöðu til þeirra en ég reyndi þó og spurning hvort að ég fari eftir niðurstöðunni sem kerfið gaf mér! Fullt af málaflokkum sem skipta mig máli eru ekki inni í þessari könnun og því ekki hægt að taka algerlega mark á henni. Þó finnst mér þetta skemmtilegt framtak og getur eflaust hjálpað einhverjum óákveðnum!

Sigurvegari

Ég var aldrei búin að tilkynna úrslitin í stóru getrauninni.

Hildur og Auður giskuðu á réttan dag og þar sem Hildur var nær réttri stærð og þyngd titlast hún sem sigurvegari keppninnar. Verðlaunin miklu felast aðallega í heiðrinum af því að giska á rétt en þó er ekki loku fyrir það skotið að matur eða kökur í einhverju magni falli í skaut sigurvegarans. Spurning um að bjóða þeim getspöku bara í kaffi við tækifæri – þegar ég segi kaffi meina ég auðvitað kökur og meðlæti en ekki svarta drykkinn ógurlega sem ég kann ekki ennþá að drekka þrátt fyrir að vera orðin 26 ára!

Eva félagi og pabbi höfðu svo rétt fyrir sér varðandi stærð og hljóta því aukaverðlaunin! Ég hef ekki enn ákveðið í hvaða formi þau verða en nammi og áfengi hafa löngum heillað félaga minn og faðir minn hefur seint sagt nei við kökum eða öðru sem þeim tengjast!

Ég þakka öllum kærlega fyrir þátttökuna og vona að flestir hafi haft gaman af!

TAKK

Ég vil byrja á því að þakka öllum þeim sem sendu okkur skilaboð, sendu okkur tölvupóst eða skildu eftir skilaboð fyrir kveðjurnar. Við réðum því miður ekki við að senda öllum svar tilbaka þar sem það hefði leitt til gjaldþrots Hafdís&Sveinbjörn corp. Þvílíkt var magnið! Við vorum auðvitað alsæl með að eiga svona marga góða vini og kunningja og erum hálf hlessa yfir öllum viðbrögðunum. Getum voða lítið annað sagt en TAKK – þið eruð æði!

Annars gengur bara allt vel hjá okkur þremur. Við erum aðeins að átta okkur á nýjum hlutverkum en þar sem litli kúturinn er afskaplega stilltur og meðfærilegur er hann ekkert að gera okkur erfitt fyrir! Hann er auðvitað bara sætastur og ég gæti auðveldlega horft á hann ALLAN daginn!

Ég vildi bara aðeins láta vita af okkur. Annars stefni ég ekki að því að skrifa mikið af fréttum af prinsinum inn á þessa síðu og ætla að reyna að standa mig í því að hafa skoðanir á öðru en kúkableyjum og uppeldisaðferðum í komandi færslum!

Segi þetta gott í bili,