Breyttar aðstæður

Lífið mitt hefur breyst umtalsvert seinustu mánuðina. Fyrir vikið hef ég þurft að aðlagst nýjum venjum og um leið hef ég eignast ný áhugamál. Ég er alveg hætt að geta tekið skyndiákvarðanir en það er nokkuð sem ég var mjög vön að gera og er á þeirri skoðun að þess lags ákvarðanir séu oft bestu ákvarðanirnar. Í dag þarf ég hins vegar að skipuleggja til þaula og plana fram í tímann. Ég er til dæmis að fara í sumarbústað frá og með næstu helgi og sú ferð var skipulögð í byrjun maí! Þá hringdi móðir mín í mig og spurði hvort að við gætum hugsað okkur að fara með henni í bústað í viku. Nú er komið að því og ég farin að hlakka talsvert til. Ég hugsa þó að ég hefði ekki hlakkað neitt minna til þó að ég hefði ákveðið að skella mér með 2 daga fyrirvara. Oft er ég á þeirri skoðun að hlutir sem eru vel skipulagðir og ígrundaðir valdi mikilli tilhlökkun og að hún valdi háum væntingum sem oft sé erfitt að standa undir. Þá verða þessir sömu hlutir ekki eins skemmtilegir þar sem væntingarnar voru of miklar.

Um helgina erum við líka jafnvel að hugsa um að skutlast í Þórsmörk í 1 dag með litla kút. Þar hyggjumst við finna fyrir frjálsíþróttafélagana og fjölskyldur þeirra. Sú ferð þeirra verður án efa mjög skemmtileg og því erum við soldið spennt fyrir því að kíkja á þau á laugardeginum ef það verður mögulegt. Á stundum sem þessum væri ansi gott að eiga fjallabíl í stað fína fjölskyldubílsins sem við eigum!

Eins og ég sagði áðan er ég komin með ný áhugamál í kjölfar breyttra aðstæðna. Núna finnst mér prýðilegt að strauja til dæmis, skoða uppskriftir, lesa stóran hluta af deginum, fara í göngutúra og að hafa ofan af fyrir syni mínum. Maður þarf að aðlagast breyttum aðstæðum og læra að meta nýja hluti.

Annars er bara gott að frétta af okkur og þar sem sonur minn kallar ætla ég ekki að hafa þetta lengra að sinni.

Góðar stundir!

Étinn lifandi

Ég átti ansi bágt með mig á meðan ég horfði á fréttir Stöðvar 2 í dag. Þar var frétt frá Taiwan að ég held sem fjallaði um að matreiðslumenn þar á bæ séu farnir að djúpsteikja lifandi fiska og bera þá fram á meðan þeir eru enn lifandi. Þá er neðri hluti fisksins djúpsteiktur en hausinn stendur eftir. Þegar fiskurinn er borinn fram er hann ennþá lifandi og kippist reglulega til. Þetta er eitt af því ógeðslegasta sem ég hef heyrt lengi. Mér finnst þetta mjög ómannúðlegt og gat ekki einu sinni horft almennilega á þetta þar sem ég fann auðvitað svo til með fisknum. Mér finnst að svona eigi ekki að gera við dýr! Þau eiga að lágmarki skilið að þjást eins lítið og hægt er og það að vera steiktur lifandi er án efa ekki þægilegt!

Eitt og annað

*Sveinbjörn er farinn að vinna sem þýðir að ég þarf að hafa ofan af fyrir sjálfri mér og syni mínum allan daginn, alla daga. Það er soldið flókið verkefni þar sem ég vil helst alltaf vera að gera eitthvað en so far so good! Á mánudaginn fórum við mæðginin í lautarferð í nágrennið með nesti og nánast nýja skó. Það heppnaðist ágætlega svona fyrir utan að aðalræðismaður minn sofnaði á leiðinni þangað og svaf þangað til í bakaleiðinni! Harry Potter hafði því ofan af fyrir mér á meðan ég japplaði á nestinu mínu – hann er prýðis félagi.

*Þessa dagana standa yfir svokallaðir Harry dagar í Hléskógum. Þeir einkennast af því að ég les fyrri bækurnar mér til ánægju og yndisauka en helst til upprifjunar svo að ég verði með öll atriði á hreinu þegar seinasta bókin kemur út í lok júlí. Ég er eins og góðum Harry-aðdáanda sæmir að sjálfsögðu búin að panta bókina. Held að ég hafi gert það í febrúar eða eitthvað álíka. Núna bíð ég bara spennt eftir komu hennar svo að ég geti lesið allt um endalokin – blendnar tilfinningar sem koma upp í sambandi við það! En ég get huggað mig við að eiga eftir að lesa bækurnar á íslensku. Þær eru pottþétt ekki alveg eins á okkar ástkæra ylhýra eins og á engilsaxnesku. Ég áttaði mig reyndar á því í gær að ég er alltaf að lesa bresku útgáfuna en ég held að sú bandaríska henti betur mínum skilningi á ensku. Bretar tala auðvitað ekki alveg eins og skrifa ekki heldur alveg eins!

*Það er ótrúlegt hvað sumarið og sælan hafa góð áhrif á sálartetrið. Lundin lyftist þvílíkt upp og ekki sakar að fá smá lit í leiðinni. Ég er búin að nota veðrið ágætlega og skelli mér reglulega í göngutúra með vagninn. Að sjálfsögðu smelli ég mér í rauð föt í stíl svo að ég skyggi nú ekki á fína vagninn Annað væri tísku-sjálfsmorð eða hvað sem það er kallað! Ég er ekki alveg inn í þessu!

*Um helgina er svo Landsmót í Kópavogi og þangað hyggst ég skella mér glöð í hjarta. Líkar prýðilega við það að hafa í einhverju að snúast næstu daga og reikna með að vera með annan fótinn þar alla helgina. Það er ekki svo flókið fyrir mig að rölta héðan en ég hugsa að ég fari þó á bílnum til öryggis ef eitthvað kæmi upp á svo að ég geti skotist heim ef eitthvað er! Þá get ég líka skotist þangað til að fæða son minn. Hann á það til að verða alveg GLORHUNGRAÐUR ansi snögglega og þá er öruggara að eiga húsaskjól svo að ég verði ekki sektuð fyrir syndsamlegt athæfi á almennafæri. Hugsa að það finnist ekki öllum viðeigandi að sjá konu með nakið brjóst á íþróttaleikvangi! Annars lenti ég í því um daginn að þurfa að gefa honum að borða í miðjum Laugardalnum. Það tókst alveg prýðilega svo að ég er komin í góða æfingu Brjóstaáhugamenn ættu því að drífa sig á öll helstu útivistarsvæðin í borginni ef þeir vilja góma mig með brjóstið út úr!

*Kubb er ansi vinsælt spil hjá okkur um þessar mundir og áhugasamir eru boðnir velkomnir. Við Sveinbjörn förum þó að vera ansi lunkin í þessu og því duga engir aukvisar á móti okkur! Ég er með einn vænan í huga sem er á landinu og ég hyggst skora á á meðan hann er hérna heima. Hugsa að ég hefði gaman af því að vinna hann í einhverju. Annars er ég stundum ægilega óheppin í þessu þó svo að Sigurjón vinur minn hafi lýst því yfir að ég væri heppnasta manneskja á jarðríkinu. Ég veit ekki hvernig hann fær það út en það þýðir ekki að þræta mikið við þann þrjóskupúka!

En það eru örugglega flestir hættir að lesa þegar hingað er komið og því ætla ég að setja punkt hér.