Nýjasta nýtt

Við Sveinbjörn fjárfestum fyrir skömmu í dvd upptökutæki. Við fengum smá pening í útskriftargjöf fyrr í ár og vorum búin að ákveða að kaupa okkur slíkt tæki fyrir hann. Nýlega fórum við í leiðangur og enduðum á því að kaupa okkur Pioneer upptökutæki með 160 Gb hörðum disk og fullt af skemmtilegum fídusum eins og maður segir á ægilega slæmri íslensku. Smám saman höfum við verið að læra á græjuna og erum alltaf að komast meira og meira að því hvað þetta er mikil snilld. Það er hægt að taka heila upptöku og skipta henni niður í nokkrar. Það er hægt að klippa auglýsingar út, skíra upptökurnar, flokka þær niður, raða og gera allan andsk…Við erum verulega ánægð með gripinn og vitum ekki hvað við gerðum fyrir komu þess. Ég er ánægðust með að geta sett á pásu þegar ég er að horfa á einhvern hátt því að þá get ég hugað að syni mínum á meðan einhverjum spennandi þætti stendur en ekki misst af neinu né þurft að bíða eftir að upptakan klárist til að horfa. Ansi hreint notalegt. Ég næ þættinum oft aftur með því að spóla hreinlega yfir auglýsingarnar.

Við ákváðum að kaupa okkur alvöru græju þar sem maður er ekki að kaupa svona tæki á hverjum degi. Reyndar fengum við upplýsingar um að maður gæti fengið eitthvað digital Ísland upptökutæki en við erum auðvitað ekki með stöð 2 og erum held ég ekki á leiðinni með að fá okkur slíkt á næstunni og við ályktuðum sem svo að við gætum þá notað þetta næstu árin alla vega. Ég er alla vega verulega stoltur eigandi. Núna þarf ég bara að læra að færa myndir og þætti frá tölvunni og yfir á gripinn góða og þá eru mér allir vegir færir. Einhverjir sjálfboðaliðar sem vilja fikta með mér?

Áhrifagirni

Stutt útgáfa: Sagan af appelsínugulu peysunni og flottu úlpunni minni sem gerðu mig ,,landsþekkta” í MS!

Ég hef alltaf kært mig um skoðanir annarra og þær hafa alla tíð skipt mig miklu máli. Oft hef ég óskað þess að hafa ekki þennan eiginleika og prísa mig sæla með að vera bara sú sem ég er. Á mínum ,,seinni” árum (ekki að ég sé gömul) hefur þetta þó alltaf skipt mig minna og minna máli. Þegar ég var lítið flón og flutti til Reykjavíkur var ég soldið útundan. Ég þekkti engann hérna og var ekki að vinna til að byrja með. Auk þess fannst mér verulega fúlt að búa í Reykjavík og vildi allra helst flytja aftur til Vopnafjarðar og fara með henni Ellen minni í Menntaskólann á Akureyri. En þar sem þetta var ekki í boði varð ég að gera mitt besta til að láta mér líða vel. Ég fékk vinnu þegar leið á sumarið og fannst ágætt að hafa eitthvað til að dreifa huganum hluta úr degi í stað þess að vorkenna sjálfri mér fyrir mitt slæma hlutskipti. Ég var að vinna með fullt af stelpum sem ég fylgdist mjög vel með þar sem ég var kannski ekki sú flottasta þegar ég flutti í bæinn – soldinn sveitalúði í mér og algjörlega í takt við tískuna sem ríkti á Vopnafirði 1997 og ykkur get ég sagt að hún var ekki alveg í stíl við það sem gekk í Reykjavík þetta sama ár. Til að mynda átti ég forláta appelsínugula og græna peysu sem var eitt sinn Einherjabúningur (Einherji er íþróttaliðið á Vopnafirði). Ein stelpan sem var að vinna þarna var soldið eldri en ég og mjög flott og sæt stelpa. Einn daginn sýndi hún mér nýju úlpuna sína sem henni fannst vera flottust í heimi. Mátaði hana nokkrum sinnum í vinnunni þennan dag og var voða montin með hana. Persónulega fannst mér hún ekkert spes en ákvað að ég væri bara ekki með vit á þessu. Þegar kom að því að kaupa úlpu á mig fyrir veturinn ákvað ég að vera jafn flott og fín og þessi stelpa og keypti mér eins úlpu. Þetta var guðdómleg Helle Hansen úlpa sem var hægt að hafa annars vegar dökkbláa og hins vegar SKÆRGULA. Þess utan var hún full af dúni svo að maður leit einna helst út eins og páskaungi í henni.

Í menntaskóla var ég einna helst þekkt sem stelpan í gulu úlpunni á hækjunum, nú eða GROHE stelpan þar sem það stóð Grohe á fínu appelsínugulu peysunni minni sem ég skartaði ítrekað fyrsta veturinn minn. Það að ég hafi verið soldið útundan á fyrsta ári er mér algjör ráðgáta…

Þessi áhrifagirni mín kom þó sem betur fer ekki fram í áfengisdrykkju né reykingum þar sem það var málaflokkur sem ég hafði sterkar skoðanir á og vildi ákveða sjálf hvernig hann færi fram. Enda byrjaði ég seint að drekka og þegar það gerðist var það algjörlega mín ákvörðun. Ég hef alla tíð verið mjög mótfallin reykingum og verð án efa alltaf. Þær eru og verða ógeðslegar!

Fleira var ekki í fréttum að sinni,

Guli páskaunginn kveður að sinni!

Nýjungar

Vegna fjölda áskoranna hyggst ég setja á fót nýjan lið í hugleiðingum mínum sem eftirleiðis mun kallast stutt útgáfa. Í þessum lið verður útdráttur úr mínum lengri skrifum fyrir dygga aðdáaendur mína sem hafa ekki tíma til að lesa allar línurnar mínar. Liðurinn verður sérstaklega tileinkaður Björgvini sem jafnframt er stórvinur minn! Þið hin getið þá væntanlega séð hvort að eitthvað krassandi standi í póstinum og ef ykkur líst ekki á stuttu útgáfuna þá einfaldlega lesið þið ekki þá löngu. Ég vil forðast frekar en heitan eldinn að vera einhvers konar skyldulesning sem enginn hefur gaman að!

Vona að þið njótið nýjunganna!

Bót og betrun

Jæja, þá er sonur minn allur að færast yfir í rútínu og er farinn að sofa meira á hverjum degi. Á tímabili þóknaðist honum ekki að sofa nema í svona 2×40 mínútur á hverjum degi og þá var ekki ýkja langur tími fyrir mig til þess að gera eitthvað. Núna hefur þetta færst til betri vegar og því hef ég tíma til að hugsa um eitthvað annað en að borða og ganga aðeins frá þegar hann sefur. Í morgun afrekaði ég til dæmis að ganga frá eftir að hafa baðað hann, setja í þvottavél, breyta svefnherberginu, ryksuga, setja í uppþvottavél, klæða mig, setja upp andlitið og ganga frá fullt af þvotti og dóti. Já, þetta get ég þegar ég tek mig til.

Helgin var afar róleg. Við skötuhjúin áttum reyndar sambandsafmæli um helgina en sökum þreytu, slefs og slens ákváðum við bara að liggja upp í sófa og hafa það gott í stað þess að halda daginn hátíðlegan. Já, þetta gerist þegar aldurinn færist yfir. Við eigum bókaða miða í leikhús eftir 2 vikur og það tækifæri verður því líklega nýtt til að fagna því að við fundum hvort annað á balli fyrir 6 árum síðan. Tíminn líður alveg svakalega hratt! Tengdamamma átti reyndar fimmtugsafmæli um helgina og í tilefni þess fórum við í bakaríð og dekkuðum upp borð í morgunsárið og vöktum hana svo. Hún var auðvitað mjög ánægð með okkur. Það er afskaplega gaman að fara í bakarí um helgar og gera sér smá dagamun. Ég var auðvitað búin að borða mitt Cheerios fyrr um morguninn þar sem ég vaknaði fyrir allar aldir (8) með syni mínum.

Næsta vika er ansi stór í mínu lífi. Þá hefjast formlegar æfingar á ný og ég ætla að freista þess að fara að hreyfa soldið á mér rassgatið á ný. Það er sko kominn tími til. Mér finnst alveg agalega leiðinlegt að vera svona mjúk. Ég er aðallega búin að fara í göngutúra síðan Sævar fæddist en hef þó farið 2 svar út að skokka. Ég er alveg í ágætis grunnformi en veit samt að Jóni á án efa eftir að takast að drepa mig mjög fljótlega. Ég hef auðvitað ekki æft neitt að ráði í rúmlega 1 og hálft ár svo að eitthvað eiga vöðvar og festingar eftir að kvarta! Ég ætla þó að taka skynsemina á þetta eins og annað og reikna með að auka æfingar smám saman og láta þetta gerast í litlum skrefum. Held að það sé ekki skynsamlegt fyrir mig að mæta 6 x í viku strax í fyrstu vikunni og æfa í 3 tíma. Ég hlakka hins vegar alveg verulega mikið til og reikna með að þetta verði alveg svaðalegt stuð hjá mér og Jóhönnu félaga mínum!

Annars er bara lítið og lélegt að frétta og því segi ég þetta gott í bili!

Letibrók

Ég er svo agalega léleg að skrifa inn á þessa síðu að það hálfa væri hellingur!

Sonur minn hefur ekki verið neitt afskaplega duglegur að sofa lengi á daginn og því hef ég ekki haft neitt ýkja mikinn tíma fyrir sjálfa mig og mín áhugamál. Ég hef reyndar verið aðeins að koma mér í gírinn á facebook. Er búin að vera að læra á kerfið og að dúlla mér við að taka nokkur próf. Líst ágætlega á það kerfi.

Ég horfði á þáttinn Tekinn á stöð 2 í kvöld. Ég hef ekki verið mikill aðdáandi þáttanna hingað til og heldur ekki frumgerðarinnar Punk´d. Sú skoðun mín breyttist ekkert eftir þátt kvöldsins þar sem mér fannst viðföngin, Jói Fel og Laddi, koma vel út úr hrekkjunum. Jói Fel var hinn spakasti og gerði allt sem af honum var ætlast og gott betur og Laddi var jafn svaðalega fyndinn og vanalega og ég væri sko meira en lítið til í að fá svona talhólfsskilaboð. Ég var hrifin af öllum skilaboðunum sem hann átti að lesa inn. Held að Síminn ætti bara að nota þessar upptökur – helv…góðar!

Við Sveinbjörn fórum í bíó í fyrsta skipti í ansi langan tíma um daginn. Bourne Ultimatum varð fyrir valinu og olli okkur ekki vonbrigðum. Mjög góð lokamynd sem hélt mér spenntri frá fyrstu sekúndum. Núna á ég bara eftir að sjá Oceans 13 og Die Hard 4 og þá er ég gjaldgeng á meðal manna. Svo skilst mér reyndar að Astrópía sé eitthvað sem er skylda að sjá til að geta verið inni í umræðuefnunum þessa dagana.

Ég er búin að fara í nokkra tíma hjá Kírópraktor undanfarið og er með því að freista þess að stífleiki og bólgur í líkamanum mínum verði að engu. Ég missti 50 kg lóð ofan á bakið á mér fyrir 7 árum síðan þegar ég var að taka uppstig og misteig mig uppi á kassanum og hrundi niður með fyrrgreindum afleiðingum. Ég hef aldrei orðið góð í bakinu síðan þá og hef þurft að passa mig og get ekki beygt það né teygt í langan tíma. Ég er líka búin að vera með bólgur utan á hnjánum í 5 ár og hef verið stíf í mjöðmunum í álíka langan tíma. Jón þjálfari var líka búin að taka eftir því að mjaðmirnar á mér eru skakkar og því má segja að ég sé öll í hakki. Ég bind þónokkrar vonir við að þetta eigi eftir að hafa góð áhrif á mig og vonandi verða til þess að ég eigi auðveldara með að fara að hreyfa á mér rassgatið. Með haustinu hyggst ég fara að hreyfa mig soldið meira og freista þess að koma mér í smá form. Er strax farin að hlakka til

En ég er að hugsa um að fara að leggja mig, morgundagurinn verður væntanlega langur.

Hafið það gott, hvar svo sem þið eruð!