Alveg væri ég til…

…í eitthvað af þessum millum sem bankaræningjarnir í Danmörku höfðu á brott með sér í gær. Ætli þeir séu ekki til í að styrkja fátæka móður sem langar í íbúð? Annars gæti ég kannski líka bara sent einhverjum af þessum billjónamæringum sem búa hér á landi póst og biðja þá um að leggja hönd á plóg svo að ég geti keypt mér fínt raðhús. Já, ég er mjög nægjusöm!

Mikið svakalega voru fréttamenn annars heppnir að Bhutto skyldi verða myrt svona stuttu eftir jól. Annars hefðu þeir ekki getað fjallað um neitt með veðrið og fólk í biðröðum að skila jólagjöfunum sínum. Stundum öfunda ég þá ekki af starfinu sínu. Þeir hljóta iðulega að vera klofnir á milli þess að fagna eða syrgja þegar eitthvað svakalegt gerist.

Ég hef ekki hreyft mig að ráði í meira en mánuð! Ég veit ekki alveg hvað er að gerast með mig en letin er öllu öðru yfirsterkari. Þessi leti olli því líka að ég bakaði ekkert fyrir jólin, fékk mér ekki jólaföt eða neitt annað fínt fyrir jólin, fór ekki í klippingu og gerði satt best að segja bara ekki neitt annað en að knúsa strákana mína og eyða tíma með fjölskyldunni minni. Ótrúlegt en satt komu jólin nú samt!

Þessa dagana er ég líka að velta fyrir mér hvað ég eigi að gera þegar barnseignarleyfi mínu líkur. Það kemur margt til greina og ég þarf að fara að vega og meta. Eitthvað á þeim lista á eftir að leggjast misvel í ættingja og vini en það verður líka bara að hafa það!

Við Sævar gerðumst naglar í gær og fórum út með snjóþotuna. Syni mínum fannst það sko alveg prýðilegt að láta mömmu sína draga sig fram og tilbaka og var bara nokkkuð montinn með sig. Mjög fljótt var mér orðið kalt á fótunum og ákváð þá um leið að honum væri örugglega ekki mikið heitara þó svo að hann væri í flísgalla undir útigallanum. En við vorum útitekin og sælleg þegar við komum inn.

Einhverra huta vegna er ég ekki ýkja spennt fyrir áramótunum í ár. Alveg síðan ég flutti í bæinn hef ég ekki haft mjög gaman af því að eyða áramótunum í borginni. Mér fannst þau alltaf miklu skemmtilegri á Vopnafirði og í raun mun hátíðlegri – þar gekk maður á milli húsa rétt eftir miðnætti til að óska öllum gleðilegs árs og hélt því áfram á ballinu um nóttina. Hérna keppist fólk við að eyða eins miklum peningum og hægt er í flugelda og annað rusl og útkoman verður sú að alltof mikið er af þessu dóti og allir fá leið á þessu fyrir áramót. Ég væri því alveg til í að skella mér bara upp í bústað með ættingjum/vinum. Svo veit ég auðvitað ekkert hvernig sonur minn á eftir að upplifa öll lætin – það kemur væntanlega í ljós á næstu dögum en ef ég þekki hann rétt á hann bara eftir að góna upp í loft og segja vá á sinni lensku.

Óvenjulegt

Gleðileg jól mínir kæru vinir og félagar. Vona að þið hafið átt ánægjulegan aðfangadag og fengið margt fallegt.

Að þessu sinni voru jólin mín með frekar óhefðbundnu sniði. Svo virðist sem breytingar verði á mínu jólahaldi á 10 ára fresti þar sem meiriháttar breytingar urðu seinast jólin 1997 þegar ég og fjölskyldan mín fluttumst búferlum. Þau jól voru okkur öllum erfið þar sem allar jólahefðirnar okkar flugu út í buskann. Hugurinn okkar var allan tímann austur á Vopnafirði þó svo að líkaminn væri hér í bæ.

Að þessu sinni urðu nokkrar breytingar á jólahefð minnar fjölskyldu.  Í fyrsta lagi var nýr fjölskyldumeðlimur kominn í hópinn, ungur og afar hress. Í öðru lagi var einn fjölskyldumeðlimur horfinn á braut, amma mín, sem bjó í kjallaranum hjá foreldrum mínum, lést í ágúst síðastliðnum en hún var hjá okkur á jólunum í 10 ár. Í þriðja lagi voru Sveinbjörn, mamma hans og bróðir hjá okkur að þessu sinni en við skötuhjúin höfum aldrei verið saman á jólum síðan við byrjuðum saman fyrir 6 árum síðan. Því má með sanni segja að jólin í ár hafi verið óvanaleg. En þrátt fyrir allar þessar breytingar voru jólin ofsalega notaleg og hátíðleg að þessu sinni. Sævar var eins og engill allt kvöldið. Hann varð strax mjög hrifinn af fyrstu gjöfinni sinni og lék sér eiginlega með hana allt kvöldið – nema þegar hann reif af sér sokkana og klappaði pökkunum sínum svolítið. Algjört yndi þessi elska. Hann svaf líka af sér jólamatinn úti í garði svo að það varð ekkert af því að afi hans gæfi honum rjúpu að smakka. Maturinn var náttúrulega algjör dýrð og engin lýsingarorð eru nógu stór til að lýsa því hvað hann var góður. Mamma er einn besti kokkur sem fyrirfinnst að mínu mati og ég hef reyndar heyrt að það sé í móðureðlinu að elda góðan mat. Reyndar er mamma hans Sveinbjörns undantekningin sem afsannar regluna og sjálf kem ég til með að þurfa að herða mig til að halda reglunni gangandi.

Ég fékk margt afskaplega fallegt í jólagjöf og þakka öllum þeim sem gáfu mér eða mínum gjöf þessi jól. Sævar fékk auðvitað HELLING af gjöfum og var held ég bara nokkuð montinn með sig.

En ég verð að fara að gera mig klára fyrir fyrsta jólaboðið og segi þetta því gott að sinni!

Njótið jólanna!

Allt sem ég vil um jólin ert þú…

Mér finnst svolítið skemmtilegt þegar skemmtileg ensk (lesist jólalög sem sungin eru á ensku) eru þýdd yfir á íslensku. Það er forvitnilegt að heyra hvernig til tekst og stundum er afraksturinn frekar góður. Mér finnst All I want for christmas vera ágætlega þýtt og Friðrik Ómar er mér vel að skapi svo að ég hlustaði af áhuga í gær þegar ég heyrði lagið í fyrsta skipti. Ég er þó alls ekki að segja að íslenska útgáfan sé betri en mér finnst samt mjög gaman að hafa mikið af jólalögum á íslensku þar sem það er jólalegra að mínu mati.

Ein útvarpskona lýsti því yfir um daginn að jólalegasta jólalagið væri Last Christmas með Wham. Ég er alls ekki sammála því. Mér finnst það skemmtilegt lag en jólalegasta jólalagið að mínu mati er Heims um ból eða Ó, helga nótt. Bæði á íslensku og afskaplega falleg lög. Ég vil helst ekki heyra þau fyrr en rétt fyrir jól þar sem þá kemst ég alveg í lokaloka jólaskapið.

Þessi jól verða reyndar frábrugðin að mörgu leyti. Fyrstu jólin sem ég er með lítinn pjakk og svo verður tengdamamma og bróðir hans Sveinbjörns með okkur á aðfangadag heima hjá mömmu og pabba. Hingað til höfum við skötuhjúin verið í sitthvoru lagi þar sem jólin hjá tengdamömmu og Daníel bróður Sveinbjörns yrðu frekar skrýtin ef þau væru bara tvö heima. Ég held að sonur minn verði afskaplega hrifin af þessu fyrirkomulagi þar sem hann kann afskaplega vel við að vera umvafinn ömmum og öfum. Honum finnst athygli ekkert slæm ólíkt foreldrum sínum!

Annars er það helst að frétta að jólagjafakaup ganga hægt. Ég er bara rétt byrjuð og veit ekki alveg hvað veldur þessari leti minni. En ég þarf klárlega að fara að sparka í rassgatið á mér og rífa mig í að gera eitthvað. Ég er ekki búin að baka eina smákökutegund þrátt fyrir fögur fyrirheit!

USS…

Þangað til næst – verið góð við hvort annað!