Tíminn flýgur

Mér finnst árið vera nýbyrjað en samt er mars að hefja göngu sína á morgun. Ótrúlegt hvað dagarnir líða hratt og um leið árið. Ég heyrði fyrir löngu að tíminn liði hraðast þegar maður væri gamall en hægast þegar maður er ungur. Ég man ekki eftir að tíminn hafi liðið hratt þegar ég var barn og þá sérstaklega ekki þegar ég var að bíða eftir einhverju álíka merkilegu og afmælinu mínu. Þá leið tíminn alltof hægt og ég hélt að dagurinn kæmi aldrei.

Með tíð og tíma hætti ég að bíða eftir afmælisdögunum mínum. Þeir koma bara og fara. Ég hef samt afskaplega gaman af því að eiga afmæli og nýt aukinnar athygli í hvívetna en umstanginu sem fylgir afmælum er ég ekki eins hrifin af. Það er verulega ósanngjarnt að afmælisbarnið þurfi að baka allar sínar kökur sjálfur. Reyndar get ég ekki státað mig af því að hafa útbúið alla rétt í afmælum seinustu ára þar sem mamma hefur iðulega átt megnið eða stóran part af heiðrinum. Á morgun rennur enn einn afmælisdagurinn upp og ég er ekki enn búin að ákveða hvað eða hvort ég geri eitthvað. Þó er ég reyndar búin að ákveða að ef ég geri eitthvað býð ég bara fjölskyldunni. Stór hluti af þeim sem mér þykir vænt um er erlendis um þessar mundir (get talið 6 í fljótu bragði sem eru svona nánasti, nánasti hringur) og því vantar mikilvæga hlekki í vinahópana. Annars held ég að ég hafi verið frekar dugleg að halda upp á afmælin mín í gegnum tíðina. Að gamni fór ég að spá hvenær ég yrði næst þess heiðurs aðnjótandi að eiga afmæli um helgi og hvað ég yrði gömul. Ég komst að því að ég verð 27 og 28 ára um helgi. Þrítugasti og þriðji og -fjórði afmælisdagurinn lenda líka á helgi. Svo verð ég 39 ára um helgi – mörgum finnst heppilegra að halda upp á það en fertugsafmælið sitt. Ég verð síðan 44 ára á laugardegi og 45 ára á sunnudegi. Það er nú stuð. Árið 2031 verð ég fimmtug og sá dagur lendir akkúrat á laugardegi þannig að ef ég næ þeim merka áfanga að verða fimmtug megið þið sem ég verð enn í sambandi við búast við boðskorti. Maður þarf að fagna því ærlega! Spurning hvort að ég verði orðin amma eins og mamma varð nokkrum dögum áður. Ji, skrýtið að hugsa sér að eftir ,,nokkur” ár verði sonur minn orðinn fullorðinn! En við þær vangaveltur ætla ég að hætta að velta mér uppúr þessu.

Að öðru.  Ég hef mikið verið að spá í það undanfarið hvað mig langi mest í í öllum heiminum. Það er – ef ég mætti fá eina gjöf af öllu sem er til í heiminum hvað ég myndi velja. Svo breytti ég þessu yfir í hvað ég myndi velja ef allir vinir mínir myndu leggja saman í stórt púkk og kaupa það sem mig langar mest í handa mér. Ég er ennþá að velta þessu dálítið fyrir mér og hef ekki komist að neinni lokaniðurstöðu. Við fyrri hugmyndina dettur mér þó einna helst í hug að mig langi í íbúð og eins og staðan er í dag væri ég alveg til í að komast í skemmtilegt sumarfrí með góðu fólki. En ég þarf að velta þessu soldið betur fyrir mér!

Hvað myndi þig langa í ef allir vinir þínir myndu leggja saman og kaupa eina stóra gjöf handa þér?

Hressleiki dagsins

er í boði Biffy Clyro sem ég uppgötvaði með aðstoð tónlistarklukkutíma Skjás Eins. Líst vel á þessa hljómsveit og ætla með hjálp youtube að grafa upp eitthvað meira með þeim. Vona að þið kunnið að meta þetta!

Eigið góðan dag!

Lífskjör

Ég var svo heppin að lenda í handahófsvali úr þjóðskrá í rannsókn Hagstofunnar á Lífskjörum Íslendinga. Þessi könnun felur í sér að ég er spurð spjörunum úr varðandi búsetu, laun, upphæð rafmangs-og hitareikninga, hvort ég geti borgað reikninga á réttum tíma og hvort ég hafi efni á að fara í frí og annað í þeim dúr. Fyrst um sinn tók könnunin klukkustund í síma en í næstu tvö skipti hefur símtalið verið í kringum 40 mínútur. Þetta er alveg agalega leiðinleg könnun og það versta við hana er að maður fær ekkert fyrir sinn snúð. Það að eyða tíma sínum svona er ekki fyrir hvern sem er og ég skil ekki alveg hvers vegna það er engin gulrót við endamarkið.

Þessi könnun fékk mig þó til að átta mig á hversu gott ég hef það í raun og veru. Þó svo að ég hafi í raun ekki efni á að kaupa mér íbúð og geti ekki leyft mér alveg hvað sem er hef ég þó efni á því að lifa og leika mér soldið. Ég stend í skilum og bý meira að segja svo vel að geta búið á heimili með tveimur bílum og öllu sem ég þarfnast (fyrir utan þvottavél og uppþvottavél reyndar en það má rökræða um nauðsyn hennar). Þvottavélin er á efri hæðinni en ég myndi mjög gjarnan vilja hafa eina út af fyrir mig.

Ég var líka spurð að því í könnuninni hvort að við hefðum fjárhagslegt bolmagn til að geta greitt fyrir óvænt útgjöld upp á 100000 krónur. Ég játaði því og viti menn – tímareim og eitthvað hjól í vélinni á Renaultinum fóru og viðgerðin kostar rúmlega 100000. Ég er ekkert sérlega ánægð með þetta þar sem hann er nýbúinn í lagfæringu hjá B&L og hefur nánast ekkert verið keyrður síðan þá og sú viðgerð kostaði 50000. Mér finnst þetta ansi mikill peningur á einum mánuði fyrir ekki eldri bíl. Á alveg áreiðanlega eftir að láta eitthvað heyra í mér á eftir þegar ég sæki drusluna. Legacyinn er alltaf eins og nýr og því ekkert hægt að kvarta yfir þeirri elsku – hann er líka bestur hann Lalli.

En ég get svo sem ekki vælt neitt yfir þessu. Margir gætu ekki einu sinni borgað bílinn sinn út af verkstæðinu og yrðu að keyra hann með bilað hjól og lélega tímareim.

Svo að ég er bara nokkuð spræk!

Nýtt

Það hefur margt nýtt á daga mína drifið. Ég er í átaki á ýmsum stöðum og enn sem komið er stend ég mig bara ágætlega. Fyrsta átakið var í því að ganga jafnóðum frá hérna heima. Það hefur gengið framar vonum og því er frekar fínt hjá mér um þessar mundir og engin þörf á skynditiltektum.

Við skötuhjúin erum á fullu að skoða íbúðir þessa dagana. Við erum í kauphugleiðingum en stefnum þó ekki að því að kaupa alveg strax. Erum núna að reyna að finna út nákvæmlega hvað við viljum. Okkur finnst gott að skoða margar ólíkar íbúðir til að sjá mismunandi lausnir og með því reiknum við með að finna út hvað sé nauðsynlegt og hvað ekki og hvað við getum sætt okkur við og hvað ekki. Vona að þið hafið skilið þetta bull í mér.

Ég er líka á leiðinni inn í smá hollustuátak. Ætla að elda meira og þá í hollari kantinum og ætla að reyna að halda sætindum í lágmarki.

Annað af nýjungunum mínum er að opna hug minn og hjarta fyrir nýrri tónlist. Bergur vinur minn lumaði fyrstu menningunni að mér um daginn þegar hann skrifaði disk með Kings Of Leon handa mér. Ég hafði nefnilega heyrt lag á síðunni hans sem mér fannst lofa góðu og minntist á það hjá honum. Hann ákvað að nýta tækifærið og koma mér úr píkupoppinu og yfir í smá klassík að hans mati Ég er alveg að fíla þennan disk og á alveg örugglega eftir að biðja hann um framhaldsdisk. Þetta er nógu rólegt rokk fyrir mig. Ég veit um einn ungan mann sem á eftir að gleðjast yfir opnum huga mínum í tónlist!

Við fjölskyldan erum svo í sameiginlegu átaki í því að horfa minna á sjónvarp. Sævar er orðin hættulega hrifinn af sjónvarpinu en þó er hann iðulega hrifnastur af auglýsingum. Ef Laugardagslögin eru frátalin. Hann er nefnilega mjög hrifin af Ragnhildi Steinunni og brosir iðulega sínu blíðasta þegar hún kemur á skjáinn. Ég lái honum það sko ekki enda er hún afskaplega sæt og hugguleg ung kona. Stöð 2 er búin að vera hljóðlaus hjá okkur í langan tíma (við getum þó ekki kvartað yfir því þar sem við erum svindlarar og stelum tengingunni frá tengdamömmu). Hún var eitthvað að fikta í tengingunni hjá sér og þá hvarf hljóðið hjá okkur og það er einhverra hluta vegna ekki eins skemmtilegt að horfa á þögla þætti. Við náum þó fréttunum órugluðum sem er gott!

En ég er að hugsa um að leggja mig aðeins þar sem ég er um það bil að sálast úr þreytu.

Ekki fleira að sinni…