Heilt ár

Mér finnst ótrúlegt að hugsa til þess að heilt ár sé liðið síðan ég fékk fyrstu verkina tengda meðgöngu. Það var á þessu degi, 28.apríl og á þessum tíma fyrir ári síðan var ég á fullu að skipta um á rúminu og leggja lokahönd á undirbúning fyrir komu krónsprinsins. Mér finnst ekki lengra síðan en í gær að ég lagði af stað upp á Skaga og þjáðist í nokkra tíma til að fá loksins þetta litla rassgat upp í hendurnar.

Ansi margt hefur gerst og breyst á þessu eina ári. Það fylgja miklar breytingar því að eignast barn og í raun meiri en maður reiknar fyrirfram með. Það er jú ómögulegt að vita hvernig eintak maður fær upp í hendurnar og hvort að allt komi til með að vera í lagi og virka eðlilega. Við vorum svo heppin að fá alheilbrigðan dreng sem hefur þó látið vel í sér heyra þegar honum mislíkar eitthvað síðan þá.

Það eina sem ég var samt alveg að misreikna voru tilfinningarnar sem fylgja því að eignast barn. Það er ekki hægt að útskýra hversu heitt maður elskar afkvæmin sín fyrr en maður reynir það sjálfur. Það er EKKERT sem maður gerði ekki fyrir þessar elskur og það eitt að horfa á þau gera einföldustu hluti fyllir mann meira stolti en hægt er að lýsa með orðum.

Sævar Daði á sem sagt eins árs afmæli á morgun. Ég reikna með að vera súper góð við hann í tilefni dagsins og gera nánast allt sem honum finnst skemmtilegast. Svo er afmælisveisla hjá okkur á miðvikudaginn þar sem fjölskylda og litlir vinir mæta á svæðið. Það verður væntanlega frekar mikið fjör. Á miðvikudaginn öðlast ég líka nýja reynslu. Þá fæ ég að fá smjörþefinn af því hvernig er að eiga þrjú börn en í tvo daga verða Guðmundur Gígjar og Arney Dagmar (börn Bjössa Arngríms og Gunnhildar) í pössun hjá okkur. Ég reikna líka með frekar fjörugum dögum með þau hér á bæ en það er nokkuð bókað að Sævar á eftir að vera glaður með nærveru þeirra. Þau eru auðvitað svo miklu skemmtilegri en aldraðir foreldrar hans.

En ég er víst að ákveða hvað ég ætli að hafa á boðstólnum á miðvikudaginn og svo er ekki seinna vænna en að byrja að baka…

Bið að heilsa í bili!

Tilvonandi vinningshafi

Það sem helst er frá að segja í mínu lífi þessa dagana er óbilandi trú mín á því að ég sé að verða milljónamæringur innan skamms. Ég ætlaði að vinna 410 milljónir í Víkingalottóinu um daginn en einhverra hluta vegan misskildu guðirnir það eitthvað og skutluðu vinningnum til einhvers finna. Ég var ekki ýkja hrifin af þeirri ákvörðun þeirra en hugga mig við að hann hafi vonandi haft meiri not fyrir það en ég.

Ég er nefnilega á leiðinni að kaupa mér íbúð og hugsa að það að eignast um 400 milljónir myndi ekki hamla mér mikið. Ég er reyndar ekki á leiðinni að gera eins og 17 skvísan sem rífur hús og byggir annað í staðinn. Sér í lagi finnst mér ekki alveg sniðugt að eyða 50 milljónum (veit ekki nákvæma upphæð) í hús sem eini tilgangurinn með er að rífa og byggja nýtt 100 milljóna í staðinn. Það er alveg agalega leiðinlegt fyrir fátæklinga eins og okkur þegar þessir ríkisbubbar fara svona með peningana sína á meðan við þurfum að fylgjast með nánast hverri krónu og safna okkur fyrir húsi í langan tíma.

En mótlætið herðir mann, styrkir, bætir en kætir ekki!

Fullorðins

Ég er agaleg og ég veit það! Ég á ekkert nema skít og skammir skilið og geri mér fullkomlega grein fyrir því! Ég ætla ekki einu sinni að reyna að byrja að afsaka mig þar sem það kæmi ekkert betur út fyrir mig!

Ég fullorðnaðist talsvert í gær þegar ég fjárfesti í þremur forláta pottablómum. Lifandi og allt! Komst svo að því þegar ég kom heim með hjálp tengdamóður minnar tilvondi (eða svona allt að því) að tvær af plöntunum eru auðdrepanlegar. Þetta eru ekki mjög góðar fréttir fyrir mig þar sem ég er frekar gleymin og ótrúlega mikill kjáni þegar kemur að einhverju svona og því hefur verið sett upp veðmál varðandi það hversu langt sé þangað til bæði blómin deyja. Það þriðja er víst nógu seigt fyrir skussa eins og mig.

Sveinbjörn er þegar búin að veðja á að þau verði dauð eftir viku (s.s föstudaginn 2.maí). Þeir sem vilja taka þátt mega skilja eftir athugasemd hér að neðan.

Mér datt s.s allt í einu í hug um daginn að kaupa mér blóm. Ég flutti að heiman fyrir 5 árum síðan og hef aldrei á þeim tíma átt pottaplöntu. Ég er nokkuð stolt af þessum fullorðinstöktum mínum og er fullviss um að plönturnar mínar séu ekki bara fallegar fyrir augað heldur líka góðar fyrir andrúmsloftið!

Þetta var alveg ægilega skemmtileg frétt og var styrt af garðheimum. Garðheimar.is blómleg veröld!

Afmæli

Tvær bestu vinkonur mínar eiga afmæli í dag. Þær eru báðar bráðnauðsynlegur hluti af mínu lífi og ég er afar þakklát fyrir að hafa fengið tækifæri til að kynnast hvorri um sig.

Ellen hefur verið vinkona mín síðan við vorum pínu pons. Við urðum bestu vinkonur um 7 ára aldur og meirihlutann af æsku okkar vorum við óaðskiljanlegar. Við erum þrátt fyrir það afar ólíkar og eigum ekki ýkja margt sameiginlegt en það virðist ekki aftra okkur frá því að vera saman. Í dag eru held ég akkúrat 20 ár frá því að við fórum að verða eins og skefti og blað, nefið og kvef, hanski og hönd.

Til hamingju með afmælið elskan mín!

Rakel kynntist ég í 2.bekk í menntaskóla og var fljótt búin að ákveða að við myndum passa vel saman. Ég tilkynnti henni meðal annars í frjálsíþróttaferð sem ég píndi hana í að við myndum verða bestu vinkonur. Henni leist nú held ég ekkert á mig fyrst um sinn þar sem ég jú frekar spes en ég hafði mínu fram að lokum. Við erum að mörgu leyti líkar í okkur. Höfum áhuga á sömu hlutum og getum endalaust spjallað. Við getum vel gleymt okkur við að tala í símann og ef ég tek upp tólið til að hringja í hana get ég nánast bókað að símtalið verði ekki styttra en klukkustund. Hún er sem betur fer flutt heim frá Danmörku og verður vonandi í seilingarfjarlægð frá mér um ókomna tíð!

Til hamingju með afmælið elskan mín!

Hver segir svo að stjörnumerki hafi ekki áhrif á fólk þegar tvær af bestu vinkonum mínum eiga afmæli sama dag! Tilviljun – ég held ekki!

Ég vona að sjálfsögðu að þið hin eigið líka yndislegan dag!

Þægindi

Ég er búin að ætla að setja inn smá færslu um hluti sem vekja upp notalegar tilfinningar í soldið langan tíma en hef alltaf gleymt því þar til núna. Það eru nokkrir hlutir sem veita mér svona sælutilfinningu og meðal annarra eru það þessir:

-að skríða undir brakandi hrein rúmföt og fara að sofa

-að fara á klósettið þegar maður er búinn að halda lengi í sér

-að koma hreinn úr sturtu/baði

-að leggjast á koddann þegar maður er súper þreyttur

-að borða ofsalega góðan mat

-gott knús

-að ná langtímamarkmiði

-að hreyfa sig

-eftir að hafa tekið svakalega erfiða æfingu en klárað hana

- cheerios í morgunsárið

- að finna hreyfingar inn í leginu á sér

- sú tilfinning að maður sé allur heimurinn í augum einhvers

1.apríl

Ég er ekki ýkja hrifin af þeirri hefð sem hefur skapast á þessum annars ágæta degi að reyna að láta fólk hlaupa, eins og það er kallað. Mér fannst þetta reyndar skemmtilegur dagur þegar ég var yngri en var þó aldrei neitt sérstaklega góð í því að ljúga og í raun er ég yfirleitt ekki neitt sérstaklega góð í þeirri iðju. Það kemst yfirleitt fljótt upp um mig!

Á þessum degi tekur maður nánast öllum fréttum með fyrirvara þar sem maður heldur að allt sé gabb og treystir engu. Fréttablaðið sagði frá því í morgun að Skeljungur ætlaði að selja bensínlíterinn á 107 krónur á einni bensínstöð sinni á milli 8 og 9.30. Þessu trúði ég ekki og hefði seint brunað af stað til að athuga hvort þetta hefði í raun verið aprílgabb eður ei þar sem maður tekur jú ekki sénsinn…

Mbl segir í dag frá bíóvef þar sem hægt sé að horfa á nýjustu myndirnar frá Hollywood án endurgjalds í dag en gjaldskrá verði birt á morgun. Ég trúi þessu auðvitað ekki heldur og fyndist að ef satt væri þá hefði verið búið að kynna þetta með meiri fyrirvara. En hvað veit ég svo sem!

Annars eru ekki miklar líkur á því að ég hlaupi eitthvað í dag þar sem hnéið á mér er fallega blátt og marið eftir tignarlega fallið mitt um daginn en ég stefni ótrauð að því að vera orðin búin að jafna mig fyrir morgundaginn þar sem þá bíður mín tvöfaldur danstími. Fyrst salsanámskeið og svo samkvæmisdansar strax á eftir…

Ég held að liður í því að ná bata sé fólginn í því að drífa sig út að hlaupa í dag – það ætti að styrkja, bæta og svo ég tali nú ekki um kæta!

Hafið það gott í dag og hlaupið nú ekki af ykkur rassgatið!