Jæja nú jæja

Long time no see eins og svo oft áður!

Ég var að koma úr sumarbústað með strákunum mínum. Við skelltum okkur í sumarbústað sem Stéttarfélag Verkfræðinga leigir nálægt Hreðavatni og Bifröst. Hann var svo sem ágætur greyið en ekki mikið meira en það. Mér fannst of margir naglar standa uppúr pallinum og því þurfti Sævar að hafa sig allan við til að rífa ekki allt skinnið af höndunum á sér. Hann er nefnilega ekkert að drífa sig að fara að labba þessi elska og fer alsæll um á fjórum jafnfljótum. Það er samt eitt sem ég skil ekki við svona bústaði – afhverju eru rúmin í þeim alltaf svona agalega mjúk? Er það ekki rétt ályktað hjá mér að meirihlutinn sofi á frekar hörðum rúmum en mjúkum? Ég veit alla vega um ansi marga sem koma hálf skakkir og skældir úr afslöppuninni í sumarbústað þar sem rúmin voru svo hrikalega vond. Við komum alla vega frekar stíf heim úr ferðinni og fannst rúmið okkar dásamlegt í nótt. Það er reyndar alveg yndislegt að geta farið í heita pottinn á hverjum degi og kyrrðin er náttúrulega bara það besta sem til er. Ótrúlegt hvað það vinnst ofan af manni fljótt í þessu stressleysi. Reyndar finnst manni fyrst um sinn að maður eigi að vera að gera eitthvað og hálf leiðist þetta aðgerðaleysi en það er afskaplega fljótt að venjast og spil eins og póker og sudoku nutu mikilla vinsælla.

Ég fór á landsleik kvenna áðan – Ísland-Grikkland. Það er smá munur að fara á kvenna og karlaleik og fyrir mitt leyti skemmti ég mér miklu betur á þessum leik en á karlaleikjunum sem ég hef farið á. Það er skemmtileg tilbreyting að fara á sigurleiki hjá landsliðinu og þær mega eiga það stelpurnar að þær spila alveg þrælskemmtilega sín á milli. Hörkuskemmtun. Ég verð reyndar líka að hrósa stuðningsmannaklúbbnum Tólfunni. Þeir sköpuðu skemmtilega stemningu með söng og klappi allan tímann og ég var allan tímann að dilla mér í takt við tónlist og trommur. 4 stjörnur af 5 mögulegum.

Við Sveinbjörn erum annars að fara að flytja í næstu viku. Erum búin að fá íbúð á efstu hæð í þríbýli í 104. Mjög skemmtileg íbúð með bílskúr og öllu. Við erum að vonum dáldið spennt og hlökkum mikið til að komast aftur út af fyrir okkur.

Atvinnuleit gengur líka afar vel – ég er komin með tvö atvinnutilboð en ætla ekki að segja neitt meira um það í augnablikinu. Mín bíða fleiri atvinnuviðtöl á næstunni og svo er ég búin að sækja um á nokkrum stöðum til viðbótar. Reyndar hefur ekkert súper dúper spennandi dottið inn á borð til mín en ég er mjög vongóð ennþá og annað af þessum tveimur leit afar vel út líka og myndi áreiðanlega henta mér vel. Svo að framtíðin er bara björt!

Ef einhver veit um gott fólk sem er að leita sér að íbúð er okkar íbúð (2 herbergja, 90 fermetra) að losna. Þið getið bara haft samband við mig ef þið hafið áhuga. Hún verður leigð út á sanngjörnu verði.

Læt þetta duga í bili!

Útrétta

Nú er ég mikil áhugakona um íslenska tungu og endrum og eins rekst ég á afar forvitnileg orð sem vekja umhugsun hjá mér. Eitt þessara er sögnin að útrétta. Mér finnst þetta afskaplega skemmtilegt orð – sérstaklega af því að ég hef ekki hugmynd af hverju það er dregið. Þ.e hvernig fer orð eins og að útrétta – að rétta út að tákna að framkvæma eittvað. Samkvæmt orðabókinni minni er það að útrétta að framkvæma eða koma í kring, einkum versla, gera innkaup. En það getur líka táknað að rétta út hönd – eins og í að hjálpa.  Er maður þá að rétta út hönd sína og hjálpa verslunum með því að versla við þær? Nei, ég hugsa að það sé ekki málið. Eftir dálitla umhugsun dettur mér engin sniðug lausn á þessu í hug og er því ekkert nær um uppruna sagnarinnar að útrétta.

Allar upplýsingar vel þegnar!

Að breyta til

Ég hef alltaf haft mikla þörf fyrir að breyta reglulega til hjá mér og alveg frá því að ég fór að hafa vit og þrek til að umturna herberginu mínu var það að mánaðarlegum viðburði.

Síðan ég flutti að heiman hef ég ekki verið eins breytingaglöð enda hef ég að mestu búið í íbúðum sem hafa ekki mikla breytingamöguleika en þó hef ég aðeins náð að breyta þeim en ekki fyrr en eftir 2 ár á hverjum stað ca. Það var því kominn tími til að stofan fengi smá upplyftingu og ég dreif í því í gær. Tilgangurinn var þó aðallega sá að búa til smá leiksvæði fyrir Sævari sem hafði þangað til í gær hýrst í litlu horni á stofunni og fyrir vikið var hann reglulega búinn að dreifa dótinu sínu frá stofunni og inn í eldhús, smá inn á bað og talsvert inn í svefnherbergi.

Ég var reyndar aðeins lengur að þessu en vanalega þar sem upprunalega hugmyndin mín hafði örlítinn galla og því þurfti að endurhugsa röðunina þegar ég var búin að raða öllu upp. Það tókst þó og þetta lítur held ég bara ágætlega út. Mér finnst þetta reyndar ekki alveg eins flott og það var en þetta er praktískara þegar maður á lítinn strump sem á mikið dót og er duglegur að drasla til.

Það leiðinlega við að breyta er allt draslið sem því fylgir. Það er auðvitað miklu erfiðara að breyta og taka til en að taka bara til. Ég var líka að breyta svo miklu og því var hellingur af drasli sem varð heimilislaust eftir á og það er alltaf erfitt að finna nýja staði undir dót – alla vega hér á bæ. Spurning um að fara að lifa í smá meiri nauðhyggju?

___________________

Ég get kannski líka ljóstrað því upp hér og nú að ég gaf tveimur vinkonum mínum miðana sem ég vann á Hróarskeldu og fyrir vikið stökk ég upp um allmörg sæti á vinsældalista beggja. Þær hafa miklu meira erindi þangað en ég þar sem þær byrjuðu að skoða hvaða hljómsveitir yrðu þarna í fyrra og hafa mun meiri tónlistaráhuga en ég. Ég væri hins vegar alveg til í að vinna afnot af Swift í ár eða Mongoose fjallahjól í leiknum sem ég var að taka þátt í á SkjáEinum áðan. En það er auðvitað ekki á allt kosið en þær geta svo sem tekið þátt í honum og gefið mér fjallahjólið í staðinn – ég yrði ekkert svekkt með það hehe

Jæja

Það er mun meira að gerast í mínu lífi en þessi síða ber merki um:

~ Ég er byrjuð að leita mér að vinnu fyrir haustið. Hugsa að það séu þó ekki margir svo tímanlegir í ráðningu en þó finnst mér sniðugt að byrja að fylgjast með markaðnum svo að ég missi nú ekki af því þegar draumastarfið mitt dettur inn. Það eru reyndar ekki margir að auglýsa eftir starfskrafti í 60-70% starf. En ég er mjög jákvæð og fullviss um að eitthvað spennandi detti inn á borð til mín fyrr en varir.

~ Við fjölskyldan erum líka farin að skipuleggja sumarfríið okkar en eigum eftir að negla það alveg niður. Það er ekki alltaf gott þegar tveir óákveðnir aðilar koma saman. Eins og er stendur valið á milli sólarstrandar í tvær vikur, sumarfríi innanlands eða heimsókn til vina í nágrenni við okkur.

~ Íbúðaleit okkar fjölskyldunnar var fyrir nokkru sett á bið. Markaðurinn er afar erfiður eins og staðan er í dag og þess utan er nánast ómögulegt að fá lán eins og við höfum áhuga á. Við höfum í raun heldur ekki fundið neina íbúð sem okkur líst súper vel á nema þessa sem við fundum í lok janúar. Við fylgjumst þó með stöðunni á markaðnum og skoðum eignir sem okkur líst á  – bæði til að æfa okkur og til að skoða möguleika á leigu. Leigumarkaðurinn er reyndar heldur ekkert sem er spennandi að fara út á þar sem íbúð eins og hæfir okkur er á verðbilinu 150-200 þúsund en í nokkrum undantekningatilvikum er hægt að finna ágætis eignir á um 130-140 þúsund. Ég væri til í að einhver góður myndi bjóða okkur eignina sína til leigu á sanngjörnu verði þar sem ég væri meira en lítið til í að komst í ,,eigin” íbúð og eiga pláss fyrir tonnið sem Sævar á af dóti og til að hann gæti bráðlega farið að sofa í eigin herbergi!

~ Ég hlakka annars bara til næstu vikna og mánaða. Stór hluti af flakkaravinum okkar eru að týnast heim um þessar mundir. Frjálsíþróttahittingur og sálfræðihittingur eru á dagskrá vikunnar. Fullt af íþróttum eru auk þess á dagskrá sjónvarpsstöðvanna í sumar sem ættu að stytta mér stundir og svo á ég tvær vinkonur í fæðingarorlofi og eina kennaravinkonu sem verður í fríi í sumar svo að þetta gæti ekki litið mikið betur út.

En ég þarf að fara að fá mér eitthvað í svanginn – læt heyra frá mér innan skamms!